სოფელ არალში სკოლის მშენებლობა წელს ვერ დასრულდება

განათლების სამინისტროს, საგანმანათლებლო და სამეცნიერო ინფრასტრუქტურის განვითარების სააგენტოს ინფორმაციით, არლის სკოლაში შპს „Civil Construction“– ის ხელმძღვანელის გარდაცვალების გამო შეჩერებული სამუშაოები ტენდერში გამარჯვებულმა კომპანია „Rooms“–მა გააგრძელა.

ტენდერის მიხედვით სკოლაში სამუშაოები 30 დეკემბერს უნდა დასრულებულიყო, თუმცა სავარაუდოდ ჩაბარების ვადა გადაიწევს.
„ამდენი ხნის განმავლობაში მშენებლობა შეჩერებული იყო, პროექტში ცვლილებების შეტანა გახდა საჭირო, სავარაუდოდ სამუშაოები დეკემბრის შემდეგაც გაგრძელდება“, – აცხადებენ სააგენტოში.

შეგახსენებთ, რომ არლის საჯარო სკოლის მშენებლობა 2015 წლის დასაწყისში დაიწყო. მშენელობა ერთ წელიწადში უნდა დასრულებულიყო. სამუშაოებს ტენდერში გამარჯვებული კომპანია შპს "Civil Construction" ასრულებდა, თუმცა მისი ხელმძღვანელის გარდაცვალების გამო, მშენებლობა შეჩერდა და ის რაც უკვე გაკეთებული იყო, ნადგურდებოდა. ამ პერიოდში, ახალი მშენებლის შესარჩევად გამოცხადებული ტენდერი პირველ მცდელობაზე ჩავარდა და მშენებლის შერჩევაც დაგვიანდა.

არლის ახალი სკოლა 192 მოსაწვლეზეა გათვლილი. შენობა ადაპტირებულია შშმ პირებისთვის. ვიდრე მშენელობა დასრულდება, არლის სკოლის მოსწავლეები სოფელში არსებული კათოლიკური და მართლმადიდებლური სამრევლო სკოლების შენობებში არიან გადანაწილებული.

[თინათინ ზაზაძე, ადიგენი]