არალში სკოლის მშენებლობისთვის ტენდერი მეორედ გამოცხადდება

განათლების სამინისტროში ამბობენ, რომ ტენდერი, რომლის ფარგლებშიც სკოლაში ძირითადი სამუშაოები შესრულდა, ამ ეტაპზე გაუქმებულია. უახლოეს მომავალში კი სამინისტრო ახალ ტენდერს გამოაცხადებს.

არლის საჯარო სკოლის მშენებლობა 2015 წლის 21 იანვარს დაიწყო და გასული წლის, ნოემბრის თვეში უნდა დასრულებულიყო. სამუშაოებს ტენდერში გამარჯვებული კომპანია შპს ,,Civil Construction“ ასრულებდა, თუმცა მისი ხელმძღვანელის გარდაცვალების გამო, რეაბილიტაცია–მშენებლობა შეჩერდა.

როგორც განათლებისა სამინისტროში განმარტავენ, მშენებელის გარდაცვალების გამო, ოჯახს სკოლის დასრულებაზე პასუხისმგებლობა არ აუღია, ამიტომ ძველი ტენდერი გაუქმდა და ახალი ტენდერის გამოცხადებისათვის მუშაობა უკვე მიმდინარეობს. მათივე თქმით, სამინსიტრო ლევან სამხარაულის სახელობის ექსპეტრიზის დასკვნას ელოდება, რომელმაც უნდა დაადგინოს რა ტიპის სამუშაოებია ჩასატარებელი.

"სამხარაულმა უნდა დაადგინოს, რა ეტაპზეა მიყვანილი მშენებლობა, რა არის კიდევ გასაკეთებელი და ამის საფუძველზე შემდეგ უნდა გამოცხადდეს ახალი ტენდერი. სატენდერო დოკუმენტაციაში შევა პირობა რა უნდა გაკეთდეს და როგორ უნდა გაკეთდეს„ – განმარტავენ სამინისტროში.

რა თანხაზე გამოცხადდება ტენდერი და როგორ განისაზღვრება მისი საბოლოო ვადა, ამას სამინისტრო სამხარაულის დასკვნის საფუძველზე დაადგენს.

რაც შეეხება ახალი ტენდერისათვის საჭირო ფინანსებს, თანხა განათლებისა და მეცნიერების სამინისტროს 2017 წლის ბიუჯეტიდან გამოიყოფა.
შეგახსენებთ, რომ პირველი ტენდერის მიხედვით, არლის საჯარო სკოლის მშენებლობის ღირებულება 1 698 000 ლარით განისაზღვრა. პროექტის მიხედვით, ძველი სკოლის ადგილზე ახალი, 192 მოსწავლეზე გათვლილი სკოლა უნდა გაშენდეს, რომელიც ადაპტირებული იქნება შშმ პირებზე.

ორსართულიან შენობაში სულ 13 საკლასო ოთახი იქნება განთავსებული. შენობის ფართობი- 2 848 კვ.მ–ია. მის შემადგენლობაში შედის ასევე - 306 კვ.მ მქონდე სპორტული დარბაზი და ხელოვნურსაფარიანი სპორტული მოედანი.





[თაკო ფეიქრიშვილი, ადიგენი]