არალში სკოლის მშენებლობა ისევ შეჩერებულია, სამუშაოები დეკემბერში უნდა დასრულებულიყო [Photos]

დღეს, 13 მარტს, არალში, მშენებარე სკოლის ეზოში, „სამხრეთის კარიბჭეს“ არავინ დახვდა. ადგილობრივები აბობენ, რომ მუშებს იშვიათად ხედავენ. არადა, კომპანია Rooms–ს სამუშაოები 2017 წლის დეკემბერში უნდა დაესრულებინა. ამ ეტაპზე, რაც ახალი დაგვხვდა ამ სკოლაში, მხოლოდ ეზოში აშენებული საქვაბეა.



განათლების სამინისტროს საგანმანათლებლო და სამეცნიერო ინფრასტრუქტურის განვითარების სააგენტოში ამბობენ, რომ მშენებლობა პროექტში შესული ცვლილებების გამო შეჩერდა და ერთ კვირაში განახლდება.

არლის სკოლის მშენებლობა 2015 წლის დასაწყისში დაიწყო და ერთ წელიწადში უნდა დასრულებულიყო. სამუშაოებს შპს "Civil Construction" ასრულებდა, თუმცა, მისი ხელმძღვანელის გარდაცვალების გამო, მშენებლობა შეჩერდა. ის, რაც გაკეთებული იყო, შენობაში ჩასულმა წვიმის წყალმა დააზიანა, ფასადიდან ჩამოცვივდა ფილები.



სამინისტრომ სამუშაოების დასასრულებლად ახალი ტენდერი გამოაცხადა. სააგენტოს პროექტში ცვლილებების შესადანად და ახალი ტენდერის გამოსაცხადებლად თითქმის ხუთი თვე დასჭირდა.

„დამატებით ჭანჭიკიც რომ შეცვალო, ამაზეც ახალი პროექტი მზადდება და დრო სჭირდება“, – აცხადებენ სააგენტოში.



Rooms –თან ხელშეკრულება 2017 წლის 1 ნოემბერს გაფორმდა. კომპანიას არა დაზიანებული ოთახების მოწესრიგება, არამედ მშენებლობის დასრულება დაევალა. დაზიანებული ოთახების და აყრილი იატაკის შესაცვლელად კი ახალი ტენდერი უნდა გამოცხადდეს.

განათლების სამინისტროს არლის სკოლის მშენებლობისთვის, თავდაპირველი გათვლებით, 1 698 000 ლარი უნდა დაეხარჯა. ახლა თანხა გაცილებით დიდია.

Civil Construction–მა, რომელმაც სამშენებლო სამუშაოების 70%–ზე მეტი შეასრულა, 1 307 000 ლარი დახარჯა. Rooms–თან ხელშეკრულება 500 000 ლარზე გაფორმდა. დაზიანებული ოთახების ხელახლა გასაკეთებლად კი ტენდერი, ორ კვირაში, დაახლოებით 350 000 ლარზე გამოცხადდება.

სააგენტოში აცხადებენ, რომ სკოლის მშენებლობა ახალი სასწავლო წლისთვის დასრულდება.











[თინათინ ზაზაძე, ადიგენი]