2014 წლის გახმაურებელი მკვლელობები სამცხე–ჯავახეთში

ახალქალაქში ახალგაზრდა მამაკაცმა შურისძიების მიზნით ბებია და შვილიშვილი მოკლა [Video], – 10 ივლისს ახალქალაქის მუნიციპალიტეტის სოფელ გოგაშენში ბებია და მისი 9 თვის შვილიშვილი მოკლეს. სამართალდამცველებმა მკვლელობაში ბრალდებული ახალგაზრდა მამაკაცი მალევე დააკავეს. როგორც გაირკვა, მკვლელობის მოტივი შურისძიებაა, მამაკაცმა საყვარელ გოგონაძე იძია შური, რომელიც ცოლად სხვას გაჰყვა. გოგაშენში ამბები ამით არ დასრულებულა. მალევე დაზარალებულების ახლობლებმა ბრალდებულის დების ოჯახები სოფლიდან გაასახლეს. თვეების განმავლობაში მათ ქონებას სოფელში პოლიცია იცავდა. მოგვაინებით, ეს ოჯახები თავიანთ სახლებში ისევ პოლიციის დახმარებით დაბრუნდნენ. მკვლელობის საქმის განხილვა სასამართლომ დეკემბერში დაიწო. საქმე ბრალდებულის გარეშე იხილება, სამხარაულის ექსპერტიზის ეროვნული ბიუროს ფსიქიატრიული დასკვნის მიხედვით, იგი ქრონიკული ფსიქიკური ავადმყოფია და პარანოიდული შიზოფრენიითაა დაავადებული.

ადიგენში სამი ახალგაზრდა მამაკაცი მოკლეს, ერთი კი დაჭრეს – მარიამობის დღესასწაულზე სოფელ ყარათუბანში მცხოვრები სამი ახალგაზრდა მამაკაცი მოკლეს, ერთ-ერთი გარდაცვლილის ძმა კი დაჭრეს. მკვლელობაში ბრალდებული ადიგენში საჯარო რეესტრის ეროვნული სააგენტოს უფროსი დავით კუბლაშვილია. მკვლელობიდან მალევე სოფლის დატოვება კუბლაშვილის ოჯახსაც მოუხდა. . საქმე ამით არც აქ დასრულებულა. ბრალდებულის ოჯახი ირწმუნება, რომ დაზარალებულებმა დაარბიეს მკვლელობაში ბრალდებულის დედის საფლავი და გაანადგურეს მათი ნათესები. საქმის არსებითი განხილვა ჯერ არ დაწყებულა.

მკვლელობა სოფელ უდეში – ადიგენის მუნიციპალიტეტის სოფელ უდეში ვალეში მცხოვრებმა მამაკაცმა ქალბატონი მოკლა, რომელსაც მისი ვალი, სოლიდური თანხა მართებდა და ვერ უბრუნებდა. გარდაცვლილი ხალხისგან ფულს სესხულობდა, მას აპროცენტებდა და მეპატრონეებს თანხის 20%–ს უბრუნებდა. თუმცა, ბოლო პერიოდში თანხის დაბრუნებას ვეღარ ახერხებდა და ბევრი ვალი დაუგროვდა. იმ მამაკაცის, რომელმაც იგი მოკლა, 80 000 ლარი მართებდა. შსს–მ მკვლელობა მალევე გახსნა, დაკავებული ჩადენილს აღიარებს.

[ნინო ნარიმანიშვილი, ახალციხე]