ახალციხის სასამართლომ სამი ახალგაზრდის მკვლელობაში ბრალდებულის საქმის განხილვა დაიწყო

სასამართლო პროცესს გარდაცვლილი ახალგაზრდების ოჯახის წევრები და თანასოფლელები ესწრებიან. სამივე ახალგაზრდის დედა სასამართლოში გარდაცვლილი შვილების ფოტოსურათებით მივიდა.

წინასასაამართლო სხდომას არ ესწრება სამმაგ მკვლლობაში ბრალდებული, ადიგენის საჯარო რეესტრის ეროვნული სააგენტოს ყოფილი უფროსი დავით კუბლაშვილი. ბრალდებულს სამი ადვოკატი იცავს.

შეგახსენებთ, რომ 2014 წლის 28 აგვისტოს, მარიამობის დღესასწაულზე სოფელ ყარათუბანში მცხოვრები სამი ახალგაზრდა მამაკაცი მოკლეს, ერთ-ერთი გარდაცვლილის ძმა კი დაჭრეს.

მკვლელობაში ბრალდებული დავით კუბლაშვილი სამართალდამცველებმა ცხელ კვალზე დააკავეს. 31 აგვისტოს კი ბრალდებულს აღკვეთის ღონისძიებად პატიმრობა შეეფარდა.

მომხდარიდან მალევე, გარდაცვლილების ახლობლების მოთხოვნით, ბრალდებულის ოჯახი სოფლიდან გაასახლეს.

კუბლაშვილის საქმეზე წინა სასამართლო სხდომა 2014 წლის 20 ოქტომბერს, 14:00 საათზე იყო ჩანიშნული, თუმცა, საქმის განხილვა ახალციხის რაიონულმა სასამართლომ შემთხვევიდან 6 თვის შემდეგ დაიწყო. პროცესი რამდენჯერმე გადაიდო, მათ შორის, კუბლაშვილის ფსიქიკური და ჯანმრთელობის მდგომარეობის გამო. სავარაუდოდ, დღევანდელ პროცესზე უნდა გაირკვეს, ნამდვილად დაეწყო თუ არა ბრალდებულს ფსიქიკური პრობლემები ციხეში მოხვედრის შემდეგ.



[ნინო ნარიმანიშვილი, თამუნა უჩიძე, ახალციხე]