იმერთუბანში მკვლელობაში ბრალდებულის დედის საფლავი დაარბიეს [Photo]

28 აგვისტოს ღამეს, ადიგენში მომხდარ სამმაგ მკვლელობაში ბრალდებული დავით კუბლაშვილის ოჯახის წევრები, რომლებიც სოფლიდან გაასახლეს, ამბობენ, რომ თანასოფლელებმა სასაფლაო სატვირთო ავტომობილით დაანგრიეს. მათივე თქმით, დარბეულია მათი ნათესები [შეგახსენებთ, მათ სოფელი ისე დატოვეს, მოსავლის აღება ვერ მოასწრეს] და გაჩეხილია ხეხილის ბაღი.

სასაფლაოს წაბილწვაზე „სამხრეთის კარიბჭე“ ადრეც წერდა. მაშინ თანასოფლელებმა და გარდაცვლილების ოჯახის წევრებმა საფლავის დაზიანების ფაქტი კატეგორიულად უარყვეს. თუმცა, შსს–ში „სამხრეთის კარიბჭეს“ განუცხადეს, რომ სასაფლაო ნამდვილად დაზიანდა.

ბრალდებულის ოჯახის წევრები ამბობენ, რომ ისინი არავის დასჯას არ ითხოვენ, უბრალოდ მათ სურთ თანასოფლელებმა საფლავი აღადგინონ.

შეგახსენებთ, მიმდინარე წელს, 28 აგვისტოს, მარიამობის დღესასწაულზე, სოფელ იმერთუბანში მცხოვრები სამი ახალგაზრდა მამაკაცი მოკლეს, ერთ-ერთი გარდაცვლილის ძმა კი დაჭრეს. მკვლელობაში ბრალდებული ადიგენში საჯარო რეესტრის ეროვნული სააგენტოს უფროსი დავით კუბლაშვილია, რომელიც შსს–მ ცხელ კვალზე დააკავა. 31 აგვისტოს კუბლაშვილს აღკვეთის ღონისძიებად პატიმრობა შეეფარდა.

კუბლაშვილის ოჯახის წევრები ამ დროისთვის სოფელში აღარ ცხოვრობენ, ბრალდებულის მამამ სოფელში დაბრუნება სცადა, რასაც დაპირისპირება მოჰყვა. იგი სოფლიდან პოლიციამ გაიყვანა. მათი სოფლიდან გასახლების მოთხოვნით, იმერთუბნელები აქციებსაც მართავდნენ.





[ნინო ნარიმანიშვილი, ადიგენი]