ადიგენში სამი ახალგაზრდა მამაკაცი მოკლეს, ერთი კი დაჭრეს

მკვლელობა დაახლოებით 22:00 საათისთვის, ადიგენის მუნიციპალიტეტის სოფელ ყარათუბნის გზაზე მოხდა. გარდაცვლილებიცა და მკვლელობაში ბრალდებულიც ამ სოფლის მკვიდრები არიან.

როგორც ადგილობრივები ყვებიან, ახალგაზრდებმა სოფელში მარიამობა აღნიშნეს. საღამოს კი დაბა ადიგენში ლუდის დასალევად წავიდნენ. მათ შელაპარაკება მკვლელობაში ბრალდებულის შვილთან სწორედ აქ მოუხდათ. მან მამას დასახმარებლად დაურეკა, დავით კუბლაშვილი კი ადიგენიდან მომავალ ბიჭებს გზაზე დახვდა და იარაღით დახოცა.

„თავის სახელზე რეგისტრირებული იარაღი ჰქონდა, სავარაუდოდ ვინჩესტერი იყო, შიგ 7 ტყვია ეტევა და აღარცერთი აღარ ჰქონდა, ყველა ისროლა. ჯერ ფეხებში ესროლა და მერე თავში ბიჭებს“, - ყვებიან ყარათუბნელები.

კუბლაშვილი სამართალდამცავებმა შემთხვევის ადგილზე დააკავეს. მომხდარიდან მალევე სამართალდამცავებმა მისი ოჯახის წევრები სოფლიდან გაიყვანეს. მათ სახლს პოლიცია დარაჯობს.



„სინათლე ჩაქრა და სიბნელეში გაიყვანეს ჩუმად, თორემ მაგას სოფელში არავინ გაატარებდა“, - ამბობს ამავე სოფლის მკვიდრი ანა კუბლაშვილი.

ადგილობრივების თქმით, მკვლელობაში ბრალდებული დაახლოებით 50 წლისაა, ჰყავს მეუღლე, ორი შვილი და შვილიშვილები. იგი 10 წელზე მეტია ადიგენში საჯარო რეესტრის ეროვნულ სააგენტოში მუშაობს.

„მაგ საღამოს თავის სახლში გარდაცვლილისა და დაჭრილი ძმების მამასთან ერთად იქეიფა, ამ ბიჭის მამა სახლში დასაძინებლად გაუშვა და თვითონ მისი შვილების მოსაკლავად წავიდა“, - აცხადებენ ადგილობრივები და ამატებენ, რომ კუბლაშვილს ლინჩის წესით გაასამართლებენ და სოფელში არასდროს შეუშვებენ.

გარდაცვლილები პროზექტურიდან ოჯახებში უკვე გადაასვენეს. დაჭრილის მდგომარეობა კი, როგორც საავადმყოფოში პირად საუბრებში ამბობენ, სტაბილურია: „ფეხში და ზურგის არეშია დაჭრილი, ოპერაცია არ გაუკეთებიათ“.

მომხდარს სამცხე-ჯავახეთის სამხარეო მთავარი სამმართველო იძიებს.



[თამუნა უჩიძე, ადიგენი]