სოფელ წნისში დაკარგულ მამაკაცს მაშველები მეოთხე დღეა ეძებენ

ახალციხის სამაშველო სამსახურში შეტყობინება 31 ოქტომბერს საღამოს შევიდა.

"მთლიანი სამსახურია მობილიზებული და სამძებრო სამუშაოებში ყველა ჯგუფი ჩართულია. სოფელ წნისში, მდინარე მტკვართან ახლოს ვეძებთ. ვინც დაინახა ეს ადამიანი, ჩვენც მის ნათქვამს მივყვებით. ნავითაც ვეძებდით, რადგან შესაძლოა მდინარეშიც იყოს", – ამბობს ახალციხის სამაშველო სამსახურის ერთ–ერთი ჯგუფის უფროსი მამუკა ზუმბაძე.

ოჯახის ნათესავის ნაირა გოგოლაძის თქმით, დაკარგულს ჯანმრთელობის პრობლემა არ აწუხებდა.

"კი ჰქონდა ტრამვა მიღებული, ადრე ავარიაში მოყვა, მაგრამ ახლა ჩვეულებრივად იყო. ყველგან ეძებენ და არსად არ ჩანს, არანაირი კვალი არ არის, – ამბობს ნაირა გოგოლაძე და ამატებს, რომ 54 წლის მამაკაცის სახლიდან გასვლის შემდეგ მისი ტელეფონი მალევე გაითიშა: დაახლოებით 17:10 საათი იქნებოდა სახლიდან რომ გავიდა და ექვსი საათი ხდებოდა დედამისმა რომ დაურეკა და გამორთული იყო ტელეფონი".

შინაგან საქმეთა სამინისტროს ინფორმაციით სამძებრო სამუშაოებში ჩართულია პოლიციაც.

[თამარ თოთაძე, ახალციხე]