ახალციხის ბაღებში საწვავი შეშის შეტანა დაიწყეს

ახალციხის N2 და N1 საბავშვო ბაღში შეშა უკვე შეიტანეს. სკოლამდელი აღზრდის დაწესებულებათა გაერთიანებაში განმარტავენ, რომ არცერთ ბაღში გათბობის პრობლემა არ არის.

„ინდ. მეწარმე ნუგზარ სანაგაძეს, რომელმაც ტენდერში გაიმარჯვა, ახლობელი დაეღუპა და ორშაბათიდან დაიწყებს მუშაობას. არცერთ ბაღს გათბობის პრობლემა არ აქვს. ვერცერთი მშობელი ვერ იტყვის იმას, რომ მის შვილს სცივა“, – ამბობს ახალციხის სკოლამდელი აღზრდის დაწესებულებათა გაერთიანების ხელმძღვანელი ნანა ბერიძე.

შეგახსენებთ, რომ ახალციხის ორ ბაღს საწვავის მარაგი არ ჰქონდა და ბაღების გასათბობად მშობლებს შეშის წამოღება სახლიდან უწევდათ.

ახალციხეში არსებული 8 ბაღიდან 4 შეშით თბება, დანარჩენი კი ბუნებრივი აირით. ბაღებში დაახლოებით 1300 აღსაზრდელია.

[თინათინ ზაზაძე, ახალციხე]