300–მდე აღსაზრდელი შესაძლოა ახალციხის ბაღებში აღარ მიიღონ

ცნობა საჯარო რეესტრიდან იმის შესახებ, რომ ბავშვი ნამდვილად ქალაქ ახალციხეშია ჩაწერილი, ქალაქის ყველა საბავშვო ბაღის აღსაზრდელის მშობელს მოეთხოვება. ამის შესახებ მათ ინფორმაცია მშობელთა კრებაზე მიიღეს.

ქალაქ ახალციხის სკოლამდელი აღზრდის დაწესებულებათა გაერთიანებაში განმარტავენ, რომ აღნიშნული მოთხოვნა ახალციხის მუნიციპალიტეტის ორად გაყოფამ გამოიწვია.

„ქალაქი და თემი გაიყო, ჩვენ გვაფინანსებს მერია. ბავშვები უნდა იყვნენ ახალციხეში ჩაწერილი, რომ სუბსიდია გაიცეს და არ იყოს არამიზნობრივი ხარჯი“, – ამბობს ქალაქ ახალციხის სკოლამდელი აღზრდის დაწესებულებათა გაერთიანების ხელმძღვანელი ნანა ბერიძე.

იმ შემთხვევაში, თუ საბავშვო ბაღის აღსაზრდელი ჩაწერილია სოფელში, მაგრამ ქალაქის ბაღში სურს სიარული, მშობელმა დაწესებულებაში დროებითი რეგისტრაციის მოწმობა უნდა წარადგინოს.

„ყველას ჰყავს ახლობელი და დროებით ჩაწერას ვითხოვთ, არასრულწლოვანთა რეგისტრაციის ბარათი, ასე ქვია“, – ამბობს ნანა ბერიძე.

ქალაქ ახალციხის მერიას სკოლამდელი აღზრდის დაწესებულებათა გაერთიანებისთვის მიმდინარე წელს 1 მილიონ 200 ათასი ლარი აქვს გამოყოფილი. ახალციხის საბავშვო ბაღებში ამ ეტაპზე 1 200–მდე აღსაზრდელია. აქედან იმ ბავშვების რაოდენობა, რომლებიც ახალციხეში არ არიან ჩაწერილი, დაახლოებით 200–დან 300–მდეა.

საბავშვო ბაღებში აგვისტოში არდადეგები იყო. სასწავლო პროცესი 7 სექტემბერს განახლდება. სკოლამდელი აღზრდის დაწესებულებათა გაერთიანებაში აცხადებენ, რომ ახალ სასწავლო წელს მხოლოდ ერთი ახალი ჯგუფი გაიხსნება.

„ბავშვების რაოდენობას შევხედავთ, რამდენი დარჩება ბაღის მიღმა და შემდეგ გავითვალისწინებთ. განცხადებები ბევრია შემოსული, მაგრამ ზოგი მშობელი იჭერს თადარიგს და რამდენიმე ბაღში წერს განცხადებას. 7 სექტემბრის მერე გვეცოდინება ზუსტი რაოდენობა. შესაძლოა ვინმე დარჩეს გარეთ“, – ამბობს ნანა ბერიძე.

ქალაქის სამ ბაღში ახალ სასწავლო წელს განახლებული ინფრასტრუქტურა იქნება. კერძოდ ერთ საბავშვო ბაღში ჯგუფის რეაბილიტაცია მიმდინარეობს, ორ ბაღში კი სანიტარულ–ჰიგიენური ნორმების დაცვით სველი წერტილები გადაიტიხრება.

[თამარ თოთაძე, ახალციხე]