ახალციხეში ბაღების გასათბობად მშობლებს შეშა სახლიდან მიაქვთ

მეორე კვირაა ახალციხის მეორე საბავშვო ბაღში მშობლებს შეშა ჩანთებით მიაქვთ. ამბობენ, რომ ვიდრე ადგილობრივი თვითმმართველობა ბაღებისთვის საწვავს შეიძენს, მანამდე ოთახებს სახლიდან წამოღებული შეშით გაათბობენ.

ახალციხეში 8 საბავშვო ბაღია, აქედან ოთხი ბუნებრივი აირით თბება, ოთხი: N1 საბავშვო ბაღი, N1 ბაგა–ბაღი, N2 ბაგა–ბაღი და N4 ბაგა ბაღი კი შეშით.

„ოთხ ბაღში ორი კვირაა გათბობა ჩართულია, დანარჩენ ბაღებს შარშანდელი ნაშთი აქვთ დარჩენილი და იმით თბებიან. რომელ ბაღსაც არ ჰქონდა, ეტყობა მშობლებთან ქონდათ ნათქვამი და იმარაგებენ. ეს არის ნებაყოფლობითი, დარწმუნებული ვარ არცერთი მენეჯერი არ ავალებს, გინდა თუ არა მოიტანეთო“, – ამბობს ახალციხის სკოლამდელი აღზრდის დაწესებულებათა გაერთიანების ხელმძღვანელი ნანა ბერიძე.
N2 ბაგა–ბაღის მსგავსად, საწვავი შეშის გარეშეა დარჩენილი N საბავშვო ბაღიც.

ახალციხის მერიის მიერ გამოცხადებული ტენდერში გასულ კვირას ინდ. მეწარმე ნუგზარ სანაგაძემ გაიმარჯვა. მერიამ საწვავის შესაძენად ტენდერი 10.000 ლარზე გამოაცხადა.

„დღეს 4 საათზე შემოიტანს შეშას იმ ბაღებისთვის, რომლებსაც ნაშთი ძალიან ცოტა აქვს და პრობლემურია. ხელშეკრულების მიხედვით, 10 ნოემბრამდე აქვთ ვადა სრულად მომარაგებისთვის. მეორე ბაგა– ბაღს და პირველ ბაგას აქვს ძალიან ცოტა რაოდენობა შეშის და დღეს მაგ ბაღებში შევიტანთ“, – ამბობს ნანა ბერიძე.

ახალციხის ბაღებში ჯამში სული 1300 აღსაზრდელია.

[თინათინ ზაზაძე, ახალციხე]