ახალციხის 8 ბაღიდან 4 ჯერ ისევ შეშით თბება

ახალციხის N2 ბაგა–ბაღი აღსაზრდელებს წელსაც შეშის ღუმელებით ათბობს, მიუხედავად იმისა, რომ დაწესებულებაში ბუნებრივი აირი შეყვანილია. მსგავსი ვითარება ახალციხის კიდევ ოთხ ბაღშია. ამ დრომდე შეშის ღუმელებით თბება N1 ბაგა, N4 ბაგა–ბაღი და N1 ბაღი.
ახალციხის სკოლამდელი აღზრდის დაწესებულებათა გაერთიანებაში აცხადებენ, რომ აღნიშნულ ბაღებში ცენტრალური გათბობის დამონტაჟება არ იგეგმება.

„ახალი ბაგა–ბაღის მშენებლობას ელოდებიან. მანდ გათბობის დამონტაჟებას აზრი არ აქვს“, – განმარტავს ახალციხის სკოლამდელი აღზრდის დაწესებულებათა გაერთიანების ხელმძღვანელი ნანა ბერიძე.

ახალციხეში ახალი ბაგა–ბაღის მშენებლობა იაძის N12–ში, მეოთხე ბაგა–ბაღის ტერიტორიაზე იგეგმება. საპროექტო სამუშაოებისთვის მიმდინარე წლის მარტში ტენდერი 40.000 ლარზე გამოაცხადეს.

მშენებლობის დაწყებამდე მეოთხე ბაგა–ბაღი უნდა დაინგრეს. ამ ტერიტორიაზე ორი, 280 და 120 მოსწავლეზე გათვლილი შენობების აშენება იგეგმება. თუმცა როდის გამოცხადდება ტენდერი სამშენებლო სამუშაოებზე, ახალციხის მერიაში ვერ აკონკრეტებენ. ახალი ბაღისთვის თანხა გაწერილი არაა არც 2017 წლის ბიუჯეტის პროექტში.

მერის მოადგილის ზაზა გელაძის განმარტებით, ახალციხის მერია თანადაფინანსების მიზნით ინვესტორს ეძებს: „პროექტი მზად გვაქვს, გვყავს კომპანია BP, ერთი ინვესტორი კიდევ დაგვჭირდება იმისათვის, რომ ბაღი ავაშენოთ“.

ვიდრე ახალციხის მერია ახალ, თანამედროვე სტანდარტებით აღჭურვილ, ენერგოეფექტურ ბაღს ააშენებს, ოთხი ბაგა–ბაღის აღსაზრდელებს გათბობა ისევ შეშის ღუმელებით მოუწევთ.

სკოლამდელი აღზრდის დაწესებულებათა გაერთიანებაში აცხადებენ, რომ ბაგა–ბაღები საწვავი შეშით უკვე უზრუნველყოფილ არიან, რისთვისაც ადგილობრივი ბიუჯეტიდან 11.000 ლარი დაიხარჯა.

61.933 ლარია გათვალიწინებული დარჩენილი ოთხი ბაღის გასათბობად, რომლებიც ბუნებრივ აირზე დამონტაჟებული ცენტრალური გათბობით სარგებლობენ.

ქალაქ ახალციხის რვა ბაგა–ბაღში 1446 აღსაზრდელი სწავლობს.







[თინათინ ზაზაძე, ახალციხე]