ადიგენის ადგილობრივი ხელისუფლება მოხეში შეკრებილებთან არ მივიდა

ადიგენის მუნიციპალიტეტის გამგებელმა ზაქარია ენდელაძემ „სამხრეთის კარიბჭესთან“ სატელეფონო საუბარში განაცხადა, რომ ამ დროისთვის ადიგენში არ არის: „ბათუმში ვარ, ტრენინგებზე, ორი დღით“.

კითხვაზე, ხომ არ გეგმავს მოხეში მისვლას ვინმე სხვა ხელისუფლებიდან, მაგალითად, მისი მოადგილეები ან საკრებულოს თავმჯდომარე, გამგებელმა განაცხადა, რომ მისი ინფორმაციით მოხეში ასვლას არავინ აპირებს: „რამდენადაც ვიცი, მოსახლეობა დაიშალა კიდეც და ახლა მოხეში სიმშვიდეა“.

ასევე „სამხრეთის კარიბჭეს“ კითხვაზე, დაბრუნების შემდეგ შეხვდება თუ არა ადგილობრივებს, გამგებელმა განაცხადა, რომ საჭიროების მიხედვით იმოქმედებს: „თუ ამის საჭიროება იქნება, შევხვდები“.

შეგახსენებთ, ადგილობრივი თვითმმართველობის წევრებთან შეხვედრას დღეს დილიდან მოხეში შეკრებილი ქრისტიანები და მუსლიმები ითხოვდნენ.

მოხეში ვითარება მეჩეთის შენობასთან მშენებლების გამოჩენამ გამოიწვია. სოფელში დილიდან მობილიზებული იყო პოლიციაც. მშენებლებმა შენობას სახურავი მოხსნეს და ნარჩენების გატანას აპირებდნენ, თუმცა, ხალხმრავლობისა და დაძაბულობის გამო სამუშაო შეაჩერეს.

ამ დროისთვის მოხის ცენტრში რამდენიმე ადგილობრივი ქრისტიანი და მუსლიმი რჩება. მცირე რაოდენობით, მაგრამ სოფელში ისევ არიან სამართალდამცველები. რამდენიმე წუთის წინ მოხეში მივიდნენ სამცხე–ჯავახეთის მუფთი მამუკა ვაშაყმაძე და ჭელის მეჩეთის წინამძღვარი ჯამბულ აბულაძე. შეგახსენებთ, ისინი ადიგენში ბათუმიდან დაბრუნდნენ, სადაც პრემიერ მინისტრს შეხვდნენ.


მეჩეთი სამუშაოების დაწყებამდე


მეჩეთი ახლა

[ნინო ნარიმანიშვილი, თამუნა უჩიძე, ადიგენი]