ყარათუბნელები სამცხე–ჯავახეთის სამხარეო სამმართველოს უფროსს შეხვდნენ

ადიგენის მუნიციპალიტეტის სოფელ ყარათუბანში მცხოვრები მოსახლეობა მოითხოვს, რომ 28 აგვისტოს ღამეს, ადიგენში მომხდარი სამი ახალგაზრდას მკვლელობაში ბრალდებულის მამა სოფელში არ დაბრუნდეს. გარდა ამისა, ყართუბნელები ბრალდებულის შვილისა და იმ ადამიანის დასჯას მოითხოვენ, რომელიც მკვლელობის ღამეს ბრალდებულთან ერთად იმყოფებოდა.

ამ მოთხოვნით ყარათუბნელები დღეს დილი ადიგენის მუნიციპალიტეტის გამგეობასთან შეიკრიბნენ და აქცია გამართეს.

"ბრალდებულის მშობელს ისევ დაბრუნება უნდა, ჩვენ არ გვინდა რომ სოფელში მოვიდეს, განა იმიტომ, რომ ამ კაცის ჯინი გვჭირს, უბრალოდ მკვლელობა კიდევ რომ არ მოხდეს, ახალგაზრდები შარში არ გაეხვნენ და უბედურება არ დატრიალდეს. შვილები დავმარხეთ და ვინც ცოცხლები დაგვრჩა, ისინიც მკვლელებად რომ არ ვაქციოთ ამიტომ არ გვინდა ამ კაცის დაბრუნება", – ამბობს ერთ–ერთი გარდაცვლილი ახალგაზრდის დედა მარინა ანდღულაძე.

ადიგენის შემდეგ ყარათუბნელებმა ახალციხეში გადაინაცვლეს და სამცხე–ჯავახეთის სამხარეო მთავარ სამმართველოსთან აქცია გამართეს. ისინი სამხარეო სამმართველოს უფროსს თეიმურაზ კალანდაძეს შეხვდნენ. შეხვედრა დაახლოებით 45 წუთის განმავლობაში მიმდინარეობდა.

"ჩვენ გვინდა, რომ სოფელი დაწყნარებული იყოს და მკვლელის ოჯახი არ შემოვიდეს. ის სახლი უნდა გაპარტახდეს, უნდა იყოს ნიმუში იმის, რომ არავინ არ უნდა მოკიდოს სხვის სიცოცხლეს ხელი", – ამბობს ერთ–ერთი გარდაცვლილი ახალგაზრდის დედა ირმა გვენეტაძე.

როგორც სამხარეო სამმართველოს უფროსთან შეხვედრის შემდეგ ყარათუბნელებმა განაცხადეს, კალანდაძემ მათ სიმშვიდისკენ მოუწოდა.

"დადებითი პასუხი მივიღეთ, მოგვიწოდებენ სიმშვიდისკენ და ყველა იქნება სათანადოდ დასჯილი", – გვითხრა სამხარეო სამმართველოს შენობიდან გამოსვლის შემდეგ ყარათუბანში მცხოვრებმა მამუკა სირბილაძემ.

შინაგან საქმეთა სამინისტროში შეხვდერის დეტალებს არ ასაჯაროებენ.

შეგახსენებთ, რომ სოფელ ყარათუბანში (იმერთუბანში), სადაც 28 აგვისტოს, მარიამობის ღამეს, საჯარო რეესტრის ეროვნული სააგენტოს ადიგენის სამსახურის უფროსმა შვილის მეგობრები, სამი ახალგაზრდა მოკლა, ადგილობრივები ბრალდებულის ოჯახის წევრის გასახლებას ითხოვენ.

სოფელში ბრალდებულის მამის დაბრუნებას 16 ოქტომბერს ადგილობრივების პროტესტი მოჰყვა. სოფელში დილიდან მობილიზებული იყო პოლიცია. საბოლოოდ, ბრალდებულის მამა სოფლიდან პოლიციამ გაიყვანა.

[თამარ თოთაძე, ახალციხე]