რატომ გაიმეტა სამი ახალგაზრდა სასიკვდილოდ ადიგენის საჯარო რეესტრის სამსახურის უფროსმა

ადიგენში, სოფელ გორგულის ხიდთან მომხდარი მკვლელობის შესახებ საქმის მასალების მიხედვით, გარდაცვლილები, ვიდრე მათ დავით კუბლაშვილი მოკლავდა, მკვლელობაში ბრალდებულსა და მის შვილს სასტიკად გაუსწორდნენ.

აღნიშნულს ადასტურებენ პროკურორი მამუკა ქომოშვილი და იურიდიული დახმარების ბიუროს ადვოკატები. მათი თქმით, მას შემდეგ, რაც გარდაცვლილებსა და ბრალდებულის შვილს ჩხუბი მოუვიდათ, შვილმა მამას დასახმარებლად დაურეკა. ადგილზე მისული დავით კუბლაშვილი კი შვილთან ერთად მათ სასტიკად სცემეს. კუბლაშვილის გამწარების მიზეზი სწორედ ეს გახდა, მან თავი ძალიან შეურაცხყოფილად იგრძნო იმის გამო, რომ შვილის ტოლმა ბიჭებმა სცემეს, გზაზე მომავალი მანქანა გააჩერა, სახლში დაბრუნდა იარაღი აიღო და ბიჭები დახოცა.

მომხდარს შემთხვევით შეესწრო ადიგენის რაიონული სამმართველოს თანამშრომელი თემურ მსხვილიძე. როგორც ადგილობრივები გელა სირბილაძე და მაკა ჩიტორელიძე ამბობენ, ამ დროს მსხვილიძე სამსახურეობრივ მოვალეობას არ ასრულებდა და სამოქალაქო ფორმით იყო. მან კუბლაშვილს ხელები გაუკავა და დაჭრილი სიკვდილს გადაარჩინა. სწორედ მსხვილიძემ შეატყობინა მომხდარის შესახებ სამართალდამცავებსაც.

„თემო ტყვიას ბეწვზე გადაურჩა“, - ამბობენ ყარათუბნელები (იმერთუბნელები).

მსხვილიძის შესახებ ინფორმაციას ადასტურებენ შინაგან საქმეთა სამინისტროში.

შეგახსენებთ, რომ 28 აგვისტოს, მარიამობის დღესასწაულზე სოფელ ყარათუბანში (იმერთუბანში) მცხოვრები სამი ახალგაზრდა მამაკაცი მოკლეს, ერთ-ერთი გარდაცვლილის ძმა კი დაჭრეს. მკვლელობაში ბრალდებული ადიგენში საჯარო რეესტრის ეროვნული სააგენტოს უფროსი დავით კუბლაშვილია, რომელიც შსს–მ ცხელ კვალზე დააკავა.

[თამუნა უჩიძე, ახალციხე]