ყარათუბნელები სამხარეო სამმართველოსთან აქციას მართავენ

სოფელ ყარათუბნის მცხოვრებლებმა აქცია დღეს, 20 ოქტომბერს ადიგენის მუნიციპილიტეტის გამგეობის წინ უკვე გამართეს.

ყარათუბნელები მოითხოვენ, რომ სამი ახალგაზრდის მკვლელობაში ბრალდებულის დავით კუბლაშვილის მამა, ტიხონე კუბლაშვილი სოფელში აღარ დაბრუნდეს.

„ადიგენის მუნიციპალიტეტის გამგებელი სამართლებრივად და კანონებით გველაპარაკება, ხალხი კი ამ კანონებს არ ცნობს. ამიტომ გადავწყვიტეთ, რომ აქცია სამხარეო სამმართველოსთან გავმართოთ“, – ამბობს აქციის მონაწილე გელა სირბილაძე.

თუ რას დაჰპირდება თეიმურაზ კანალდაძე აქციის მონაწილეებს, ამას "სამხრეთის კარიბჭე" მოგვიანებით გაცნობებთ.

შეგახსენებთ, რომ სოფელ ყარათუბანში (იმერთუბანში), სადაც 28 აგვისტოს, მარიამობის ღამეს, საჯარო რეესტრის ეროვნული სააგენტოს ადიგენის სამსახურის უფროსმა შვილის მეგობრები, სამი ახალგაზრდა მოკლა, ადგილობრივები ბრალდებულის ოჯახის წევრის გასახლებას ითხოვენ.

სოფელში ბრალდებულის მამის დაბრუნებას 16 ოქტომბერს ადგილობრივების პროტესტი მოჰყვა. სოფელში დილიდან მობილიზებული იყო პოლიცია. საბოლოოდ, ბრალდებულის მამა სოფლიდან პოლიციამ გაიყვანა.

[Sknews.ge]