პოლონეთის ჯილდო „სამხრეთის კარიბჭეს“

პოლონური ფონდი "ასოციაცია დემოკრატიული აღმოსავლეთი" საქართველოში პარტნიორ ორგანიზაცია "კავკასიის ჟურნალისტთა საერთაშორისო ცენტრთან" თანამშრომლობით, 2007 წლიდან საქართველოს რეგიონული გაზეთებისთვის ახორციელებდა პროექტს, რომლის მიზანიც რეგიონული მედიის განვითარება იყო.

პროექტის დასასრულს ფონდმა პროექტში ჩართული მედიასაშუალებებისთვის კონკურსი გამოაცხადა. კონკურსი 4 ნომინაციაში იყო: საუკეთესო სტატია, ფოტო და ვიდეომასალა ვებგვერდზე და საუკეთესო ვებგვერდი.

ნომინაციაში „საუკეთესო ტექსტი“ „სამხრეთის კარიბჭეს“ პირველი ადგილი ერგო, სტატიისთვის – „პატარები ბაღის, პედაგოგები კი ხელფასის გარეშე“. სტატია 2014 წლის 1 ივლისს ახალციხის საბავშვო ბაღებში მოულოდნელად შეწყვეტილ სწავლას ეხება. სტატიაში საუბარია იმ მიზეზეზე, რის გამოც 1600 პატარა ბაღის, 300–მდე თანამშრომელი კი ხელფასის გარეშე დარჩა. პოლონურმა ფონდმა „სამხრეთის კარიბჭე“ დიპლომითა და ლეპტოპით დააჯილდოვა.

ამავე კატეგორიაში, კარგი ტექსტისთვის სერტიფიკატი და პლანშეტი ერგო გამოცემას „მათავარი თემა სამეგრელოში“. გამოცემამ ჯილდო მიიღო სტატიისთვის – “ვინ აგებს პასუხს ბაზარში გაყიდულ თევზზე?”

საუკეთესო ფოტოსთვის დიპლომი და ლეპტოპი მიიღო გამოცემამ „გურია ნიუსი“, ფოტორეპორტაჟისთვის – „შვიდი ოჯახი ერთ “ჭერქვეშ“; სერტიფიკატი და ფოტოაპარატი ერგო „ჩემ ხარაგაულს“, ფოტოსურათისთვის – „მონაზვნები ტელეფონით“;

საუკეთესო ვიდეომასალისთვის დიპლომი და ლეპტოპი მიიღო კახეთში გამომავალმა გაზეთმა „კახეთის ხმა“, მასალისთვის – „დაბინძურებული გარემო მოსახლეობას საფრთხეს უქმნის“; ამავე კატეგორიაში სერტიფიკატითა და ფოტოაპარტით დაჯილდოვდა შიდა ქართლის საინფორმაციო სააგენტო „ქართლის ხმა“. მოწონება დაიმსახურა მასალამ – „ბიზნესმენის აგარაკზე ჩინოვნიკების ქეიფი და პროტესტი გზაზე“;

„საუკეთესო ვებგვერდის“ კატეგორიაში ლეპტოპი ერგო ტყიბულის საინფორმაციო სააგენტოს: „ოკრიბანიუსი“, okribanews.media-d.com . ამავე ნომინაციაში, გვერდის გამორჩეული ინტერაქტიულობისთვის პლანშეტი მიიღო ქუთაისის მედიასაშუალებამ PSnews.ge. ასევე პლანშეტი მიიღო „გურიის მოამბემ“ ვებგვერდზე განხილული თემების გამორჩეული ადგილობრივი ხასიათისთვის;
გამოცემა „ზუგდიდელებს“ კი ერთი წლის ინტერნეტ პაკეტი ერგო, გაზეთის ვებგვერდის დაარსებასთან დაკავშირებული გამოწვევების შედეგიანად დაძლევისთვის;

გარდა ამ ჯილდოების, სპეციალური ჯილდო, პოლონეთში სასწავლო ტური ერგოთ გამოცემებს: „ოკრიბა ნიუსი“, „მთავარი თემა სამეგრელოში“, „სპექტრი“, „ჩემი ხარაგაული“ და „სამხრეთის კარიბჭე“.

დაჯილდოების ცერემონია გუშინ, 7 ოქტომბერს, თბილისში, სასტუმრო "კოპეში" შედგა.

[ნინო ნარიმანიშვილი, ახალციხე]