პოლონეთის ფონდის კონკურსში, პირველი ადგილი ‘სამხრეთის კარიბჭეს’ ფოტოს ერგო

საუკეთესო ფოტოსთვის „სამხრეთის კარიბჭემ“ საჩუქრად ფოტოაპარატი მიიღო. კონკურსში თამუნა უჩიძის ფოტომ გაიმარჯვა – „იჯარეთელები ადიგენის ადგილობრივი ხელისუფლების წინააღმდეგ“.

ფოტო 2015 წლის 18 მარტს, ადიგენის მუნიციპალიტეტის სოფელ იჯარეთშია გადაღებული. ფოტოზე ჩანს ადგილობრივებისა და ადგილობრივი ხელისუფლების წევრთა დაპირისპირება. სოფლის მცხოვრებლები უკმაყოფილებას გამოხატავენ სტიქიის საკომპენსაციოდ დარიგებული პროდუქტის არათანაბრად გადანაწილების გამო.

„ძლიან დინამიკური და ტექნიკურად გამართული ფოტოა“, – განაცხადა დაჯილდოებისას პროექტის ავტორმა აგნეშკა ნოვინსკამ.


კონკურსში გამარჯვებული "სამხრეთის კარიბჭეს" ფოტო

მედიაკონკურსში ოთხი კატეგორია იყო.

კატეგორიაში: საუკეთესო News – ჯილდო „კახეთის ხმას“ ერგო. საუკეთესო ფოტოს გამარჯვებული „სამხრეთის კარიბჭეა“, საუკეთესო ვიდეოს კატეგორიაში „ჩემი ხარაგაულის“ ვიდეომ გაიმარჯვა, ყველაზე ინტერაქტიული ვებგვერდის კატეგორიაში კი პირველი ადგილი „სპექტრმა“ მიიღო.

ამავე კატეგორიებში დამატებითი პრიზებიც გაიცა. ფოტოს კატეგორიაში პრიზი „ოკრიბა ნიუსმა“ მიიღო, ვიდეოს კატეგორიაში „გურია ნიუსმა“ და „კახეთის ხმამ“.

გარდა ამისა, სპეციალური პრიზები მიიღეს გაზეთებმა „სვანეთი“ და „მთავარი სამეგრელოში“. ასევე სპეციალური პრიზი, ტაბლეტი ერგო საჩუქრად ლუკა კიკიას, სამეგრელოდან. ლუკამ პრიზი პირადად მიიღო, როგორც კონკურსის და ზოგადად პროექტის, ყველაზე ახალგაზრდა და წარმატებულმა მონაწილემ. დამატებითი პრიზები გაზეთ „ჩემი ხარაგაულის“ ჟურნალისტებმა: ნინო კაპანაძემ და შოთა ლომიძემაც მიიღეს და სამახსოვროდ პლანშეტები გადაეცათ.

კონკურსის დებულების მიხედვით, ყველა პრიზი მედიასაშუალებას ეკუთვნის.

„კონკურსის მიზანია, გაუწიოს ტექნიკური და შინაარსობრივი ხელშეწყობა გამომცემლობებს“, – აცხადებენ ორგანიზატორები.

კონკურსში 13 მედიასაშუალება მონაწილეობდა. ამათგან 9 პოლონეთში სტაჟირებაზე გაემგზავრება. სტაჟირებაზე მიწვეულ მედიებს წელს, გასული წლისგან განსხვავებით, კონკურსი არ გაუვლიათ, ისინი ორგანიზატორებმა კონკურსს გარეშე, თავად შეარჩიეს. პოლონეთში სტაჟირებაზე მიწვეულია „სამხრეთის კარიბჭეც“.

შეგახსენებთ, გასულ წელს "სამხრეთის კარიბჭემ" ამავე კონკურსში პირველი ადგილი აიღო საუკეთესო სტატიის კატეგორიაში.

[ნინო ნარიმანიშვილი, ახალციხე]