'სამხრეთის კარიბჭეს' სტატიამ ქარტიის პრიზი მიიღო

ქარტიამ ჟურნალისტური კონკურსის გამარჯვებულები 24 დეკემბერს, ქარტიის რიგით მერვე საერთო კრებაზე გამოავლინა. გამარჯვებულები ხუთ ნომინაციაში გამოვლინდნენ.

❖ ნომინაციაში – საუკეთესო სტატია, გამარჯვებულად "სამხრეთის კარიბჭეს" ჟურნალისტების, თამუნა უჩიძისა და ოთარ აწყურელის მასალა, "სადავო სამკვიდრებელი" დასახელდა.
❖ საუკეთესო მულტიმედია პროექტად შეფასდა ონლაინგამოცემა "ნეტგაზეთის" პროექტი “უჩინარები”, რომლის ავტორები არიან: დავით ქოქოშვილი და ელენე ხაჭაპურიძე;
❖ საუკეთესო საგამოძიებო მასალისთვის, პრიზი მიიღო სტუდია მონიტორის ჟურნალისტების, გიორგი მგელაძისა და ნინო რამიშვილის ფილმმა:"აგენტი პროვოკატორი 2".
❖ ბავშვთა საკითხების სიღრმისეულად გაშუქებისთვის დაჯილდოვდა საზოგადოებრივი მაუწყებლის ჟურნალისტი ნინო ზაუტაშვილი, გადაცემით – სასკოლო განათლება „რეალურ სივრცეში“
❖ ჟიურის გადაწყვეტილებით, წელს პრიზი არ გაიცა ნომინაციაში “საუკეთესო ვიდეორეპორტაჟი”.

თუმცა, წელს, ქალთა უფლებების მიმართულებით მნიშვნელოვანი პრობლემის წარმოჩენაში ქარტიის და გაეროს ქალთა ორგანიზაციის სპეციალური პრიზი გადაეცა აიდა მირმაკსუმოვას სტატიისთვის „საქართველოში გოგონათა წინადაცვეთის ფაქტები გამოვლინდა“ (ომისა და მშვიდობის გაშუქების ინსტიტუტი).


"სამხრეთის კარიბჭეს" სტატია, რომელმაც ქარტიის პრიზი მიიღო, ადიგენში მომხდარ რელიგიურ დაპირისპირებას ეხება. სოფელ ადიგენში
მიმდინარე წლის გაზაფხულზე მუსლიმი და ქრისტიანი თემი ერთმანეთს იმის გამო დაუპირისპირდა, რომ ქრისტიანები მუსლიმ მეზობლებს ცალკე სასაფლაოს გახსნის უფლებას არ აძლევდნენ. მართლმადიდებელი ქრისტიანები ფიქრობდნენ, რომ თუ ცალკე სასაფლაო გაიხსნებოდა, მერე იქ მეჩეთსა და მინარეთსაც დადგამდნენ. დაპირისპირება რამდენიმე დღეს გრძელდებოდა, სოფელი ორ ბანაკად გაიყო, სოფელში ვითარებას სამართალდამცველები აკონტროლებდნენ.

საქმეში ადგილობრივი ხელისუფლება და არასამთავრობო სექტორი ჩაერთო. იყო მოლაპარაკებების მცდელობა. საბოლოოდ, მხარეები შეთანხმდნენ – გადაწყდა, რომ მუსლიმების სასაფლაოსთვის ადგილს ქრისტიანების სასაფლაოს გვერდით გამოყოფდნენ. ორივეს ცალ–ცალკე შესასვლელი ექნებოდა და შუაში საზღვარს გაავლებდნენ.

"ეს არის მასალა, რომელიც გასწავლის, როგორ უნდა გააშუქო რელიგიური კონფლიქტი ისე, რომ არ დაზარალდეს არც ერთი მხარე; რომ ხელი შეუწყო მშვიდობიან დიალოგს. ამ მასალისა და საერთოდ, მისი მუშაობისთვის ეკუთვნის ამ გამოცემას ჯილდო", – განაცხადა დაჯილდოებისას აირექს საქართველოს ხელმძღვანელმა ლია ჩახუნაშვილმა.


ქარტიის პრიზის მოსაპოვებლად კონკურსი 1 ნოემბერს გამოცხადდა. ერთი თვის ვადაში საკონკურსო ნამუშევრების წარდგენა ყველა მსურველს შეეძლო. კონკურსში, ყველა ნომინაციაში, ჯამში 65 განაცხადი შევიდა.

როგორც ქარტიაში განმარტავენ, ოთხ კატეგორიაში კონკურსი IREX-ის პროექტის მხარდაჭერით გამოცხადდა, ხოლო პრიზი “ბავშვთა საკითხების სიღრმისეულად გაშუქებისთვის” დაწესებული იყო გაეროს ბავშვთა ფონდის საქართველოს წარმომადგენლობის მიერ.

[sknews.ge]