სამცხე–ჯავახეთში სასკოლო ფოტოკონკურსის გამარჯვებულები გამოავლინეს

კონკურსი პროექტის “ტყის მდგრადი მართვა საქართველოში“ ფარგლებში მიმდინარეობდა. პირველ ეტაპზე საუკეთესო ფოტოები სკოლებმა შეარჩიეს. ნახევარფინალი კი ახალციხეში, დემოკრატიული ჩართულობის ცენტრში შედგა.

კონკურსზე წარმოდგენილი 34 ნამუშევრიდან, ერთი, მესამე ადგილის მფლობელი ფოტო, ფეისბუქის ლაიქების საშუალებით გამოვლინდა, ორი კი სპეციალურმა, 9–წევრიანმა ჟიურიმ შეარჩია.

პირველი ადგილი აწყურის საჯარო სკოლის მოსწავლეს მარიამ სააკიანს ერგო. მეორე ადგილი ახალქალაქის მესამე საჯარო სკოლის მოსწავლეს შაქრო მურმანიშვილს, ლაიქებით გამარჯვებული კი ახალციხის მეექვსე საჯარო სკოლის მოსწავლე ამირან ჯანაშვილი გახდა.

სამივე გამარჯვებული პროექტის ავტორებმა და მხარდამჭერებმა სპეციალური პრიზებით დააჯილდოვეს. სპეციალური პრიზი ჰქონდა „სამხრეთის კარიბჭესაც“, რომელიც ამ პროექტის მხარდამჭერი და ჟიურის წევრი იყო. „სამხრეთის კარიბჭესგან“ ფულადი ჯილდო, 100 ლარის ოდენობით, მეორე ადგილზე გასულ შაქრო მურმანიშვილს ერგო.

სამივე გამარჯვებული ფოტო მონაწილეობას მიიღებს უკვე ეროვნული დონის ფოტოკონკურსში, რომელიც 21 მარტს თბილისში გაიმართება. თბილისში სამივე გამარჯვებული, სხვა რეგიონის გამარჯვებულებთან ერთად, ნიკო კეცხოველის სახელობის პრემიის მოსაპოვებლად იბრძოლებს.

ფოტოკონკურსს ახორციელებდა კავკასიის გარემოსდაცვითი არასამთავრობო ორგანიზაციების ქსელი (CENN) და საქართველოს გარემოსა და ბუნებრივი რესურსების დაცვის სამინისტრო, ავსტრიის თანამშრომლობა განვითარებისათვის (ADC) ფინანსური მხარდაჭერით.

კონკურსში ჩაება საქართველოს 10 რეგიონში მოქმედი საჯარო და კერძო სკოლები, მათ შორის სამცხე-ჯავახეთის რეგიონის 21 საჯარო სკოლა.

სამცხე-ჯავახეთში რეგიონული ფოტოგამოფენის მხარდამჭერები იყვნენ ადგილობრივი არასამთავრობო და მედია ორგანიზაციები:
1. სამოქალაქო ინიციატივების ასოციაცია (სია)
2. დემოკრატ მესხთა კავშირი
3. ახალციხის ახალგაზრდული ცენტრი
4. რეგიონული დამოუკიდებელი გაზეთი "სამხრეთის კარიბჭე"
5. ბორჯომის ტელევიზია

მათი ფავორიტი ფოტოს ავტორები სპეციალური საჩუქრებით დააჯილდოვა ფოტო გამოფენის მხარდამჭერმა ხუთივე ორგანიზაციამ.

[ნინო ნარიმანიშვილი, ახალციხე]