ახალციხეში მცხოვრებ დევნილებს ბინებს ჯერ არ გადასცემენ

იძულებით გადაადგილებულ პირებმა ახალციხეში საცხოვრებელი ფართის დასაკავებლად აპლიკაციები უკვე შეავსეს, თუმცა დევნილები ბინებით ჯერ ვერ დაკმაყოფილდებიან. მშენებელმა კომპანიამ, რომელიც დევნილებისთვის საცხოვრებელ ბინებს არემონტებს, შენობის რეკონსტრუქცია დადგენილ ვადებში ვერ დაასრულა.

„მშენებელი კომპანია, რომელიც დევნილებისთვის საცხოვრებელ კორპუსს არემონტებს, ვადებში ვერ ჩაეტია, ეს მათი მიზეზით მოხდა. დაგვპირდა, რომ ობიექტს ნოემბრის შუა რიცხვებში ჩაგვაბარებს“, – ამბობს საქართველოს ლტოლვილთა და განსახლების სამინისტროს შიდა ქართლისა და სამცხე – ჯავახეთის ტერიტორიული ორგანოს უფროსი თამაზ გვიმრაძე.

შეგახსენებთ, რომ ახალციხეში ყოფილი – სკოლა ინტერნატის შენობის რეაბილიტაცია მიმდინარე წლის 4 აპრილს დაიწყო. ტენდერში 700 ათასი ლარით შპს „სენმა“ გაიმარჯვა, რომელიც დევნილებისთვის ორ სამსართულიან კორპუსში ერთოთახიან, ოროთახიან და სამოთახიან 66 საცხოვრებელ ბინას აკეთებს.

17 ივლისიდან 18 ივლისის ჩათვლით იძულებით გადაადგილებულმა პირებმა ახალციხეში საცხოვრებელი ბინების დასაკავებლად აპლიკაციები ახალციხის მუნიციპალიტეტის გამგეობის შენობაში შეავსეს.

სულ 65 განაცხადი შევიდა, რომელსაც საქართველოს ლტოლვილთა და განსახლების სამინისტროში შექმნილი სპეციალური კომისია სწავლობს. საცხოვრებელი ფართით ის ოჯახები დაკმაყოფილდებიან, რომლებსაც ბინები საკუთრებაში არ აქვთ და სახელმწიფო მათ ფულად კომპესაციებს არ აძლევს.

[მანანა სარაშვილი, ახალციხე]