ბორჯომში დევნილებს ბინებს უნაწილებენ

საქართველოს დევნილთა და განსახლების სამინისტროს შიდა ქართლისა და სამცხე – ჯავახეთის ტერიტორიული ორგანოს წარმომადგენლებმა ბორჯომში მცხოვრები დევნილი ოჯახებისთვის, კენჭისყრის პრინციპით, საცხოვრებელი ფართების გადანაწილება დაიწყეს.

დევნილთა და განსახლების სამინისტროს შიდა ქართლისა და სამცხე – ჯავახეთის ტერიტორიული ორგანოს უფროსის თამაზ გვიმრაძის თქმით, იმ ოჯახებს, რომლებიც ახალი საცხვრებელი ფართით დაკმაყოფილდნენ, ბინის გასაღებს სამინისტროს წარმომადგენლები გადასცემენ.

„ბორჯომში დევნილი ოჯახებისთვის კენჭისყრის პრინციპით, საცხოვრებელი ფართების გადანაწილების პროცედურა 3 ოქტომბერს ჩავატარეთ. ყველაფერი გარკვეულია. ველოდებით სამინისტროს წარმომადგენლებს, რომლებიც დევნილებს ბინის გასაღებს გადასცემენ“, – ამბობს თამაზ გვიმრაძე.

ახალი საცხოვრებელი ფართი 18 – მა ოჯახმა მიიღო. როგორც თამაზ გვიმრაძე ამბობს, აღნიშნული ოჯახები ბორჯომში, ლიკანი N2 – სა და ლიკანი N3 – ში ცხოვრობდნენ.

შეგახსენებთ, რომ ბორჯომში ვაშლოვანის დასახლებაში მდებარე ყოფილი სამშობიაროს შენობაში რვა ერთოთახიანი, ხუთი ოროთახიანი და ხუთი სამოთახიანი ბინა მოეწყო. შენობა არის გაზიფიცირებული, გაკეთდა ინდივიდუალური გამრიცხველიანებაც.

დევნილებისთვის განკუთვნილი შენობა ადაპტირებულია შეზღუდული შესაძლებლობების მქონე პირებისთვის.

[მანანა სარაშვილი, ბორჯომი]