რატომ გადაიდო ახალციხეში დევნილებისთვის ბინების განაწილების პროცესი ორჯერ

ახალციხეში, რუსთაველის N113 – ში მდებარე ყოფილი სკოლა-ინტერნატის შენობის რეაბილიტაცია ჯერ არ დასრულებულა. ახალციხეში დევნილებისთვის ბინების განაწილების პროცესი უკვე მეორედ გადაიდო.

კითხვაზე რატომ ვერ დასრულდა დადგენილ ვადებში შენობის რეაბილიტაცია და ამის მიზეზი ხომ არ იყო შენობის არასწორად დაპროექტება, საქართველოს ოკუპირებული ტერიტორიებიდან, იძულებით გადაადგილებულ პირთა, განსახლებისა და ლტოლვილთა მინისტრის მოადგილე მამუკა ცოტნიაშვილი გვპასუხობს, რომ ობიექტის დროულად დაუსრულებლობის მიზეზი სამშენებლო კომპანიის პრობლემები გახდა.

„შენობა ისეა დაპროექტებული, როგორც უნდა იყოს, უბრალოდ, აქ პრობლემები იყო სამშენებლო კომპანიასთან დაკავშირებით. მაგრამ უკვე გამოსწორებულია, ვალდებულება, რომელიც კომპანიამ აიღო, ბოლომდე მიჰყავს“, – ამბობს მამუკა ცოტნიაშვილი.

მისივე თქმით, დევნილების საცხოვრებელი ბინების რეაბილიტაცია უკვე სრულდება, სამშენებლო კომპანია სამინისტროს ობიექტსს 25 დეკემბერს ჩააბარებს:
„სავარაუდოდ, დევნილებს აპლიკაციები უკვე შევსებული აქვთ, ქულებიც დათვლილია. შენობის რეაბილიტაცია თვის ბოლოს დასრულდება, ვნახავთ როგორ გაკეთდა და ამის შემდეგ უკვე ბინების განაწილების პროცესს დავიწყებთ“.

შეგახსენებთ, რომ ახალციხეში ყოფილი სკოლა-ინტერნატის შენობის რეაბილიტაცია მიმდინარე წლის 4 აპრილს დაიწყო. დევნილებისთვის ორ სამსართულიან კორპუსში ერთოთახიანი, ოროთახიანი და სამოთახიანი 66 საცხოვრებელი ბინა კეთდება.

სატენდერო დოკუმენტაციის თანახმად შენობის რეაბილიტაცია მიმდინარე წლის სექტემბერში უნდა დასრულებულიყო, თუმცა მშენებელმა კომპანიამ შპს „სენმა“ შენობის რეკონსტრუქცია დადგენილ ვადებში ვერ დაასრულა. ამის შემდეგ, ვადა ნოემბრის შუა რიცხვებამდე გაუხანგრძლივეს, მაგრამ კომპანიას დრო მაინც არ ეყო.

[მანანა სარაშვილი, ახალციხე]