ახალციხის ბიბლიოთეკებს წიგნები გადაეცა

თვითმმართველობის ორგანომ ჯამში 55 წიგნი შეიძინა. ახალციხის ცენტრალურ და საბავშვო ბიბლიოთეკას 33, ხოლო რაბათის ბიბლიოთეკას 22 სხვადსხვა ჟანრის ლიტერატურა გადასცა.

როგორც „სამხრეთის კარიბჭესთან“ ბიბლიოთეკის მენეჯერი აცხადებს წიგნები მაღაზია „ბიბლუსში“ თავად შეარჩიეს, მერიამ კი, ააიპ „ ახალციხის კულტურის დაწესებულებათა გაერთიანებისათვის“ გამოყოფილი სუფსიდიით თავად შეუძინა.

„აქამდე ჩვენ ვყიდულობდით. ვერ გავიგე ასე, რატომ გააკეთეს. წიგნების შეძენის პროცედურა დროში გაიწელა და ფასი მოემატა, რის გამოც იმაზე ნაკლები წიგნი შევიძინეთ, რაც მკითხველის ინტერესებიდან გამომდინარე შერჩეული გვქონდა“–აცხადებს ახალციხის ცენტრალური ბიბლიოთეკის მენეჯერი ქეთევან მელიქიძე.

ახალციხის მერიამ, ააიპ „ ახალციხის კულტურის დაწესებულებათა გაერთიანებაში“ შემავალ ბიბლიოთეკებს წიგნებისთვის ჯამში 896 ლარი დახარჯა.

მიმდინარე წელს ააიპ „ ახალციხის კულტურის დაწესებულებათა გაერთიანებისათვის“ წიგნების შესაძენად ადგილობრივი ბიუჯეტიდან 3.120 ლარია განსაზღვრული.

[ლუბა გიორგაძე, ახალციხე]