მინი ფეხბურთის ჩემპიონატში გამარჯვება "დელტამ" მოიპოვა

ახალციხეში მინი ფეხბურთის ჩემპიონატი ერთი თვის განმავლობაში მიმდინარეობდა. მასში მუნიციპალიტეტის მასშტაბით 16 გუნდი მონაწილეობდა. ფინალი დღეს, 24სექტემბერს გაიმართა, სადაც ერთმანეთს 9 აპრილის გუნდი და "დელტა" დაუპირისპირდნენ. თამაშის ძირითადი დრო ფრედ 4-4 დასრულდა. რის შემდეგაც პენალტების სერია დაინიშნა. საბოლოოდ გამარჯვება "დელტამ" მოიპოვა.

ახალციხის მუნიციპალიტეტის საკრებულოს თავმჯდომარემ და მისმა მოადგილემ, კულტურის სამსახურის წარმომადგენლებთან ერთად პირველ და მეორე გუნდებს მედლები, სიგელები და სამახსოვრო საჩუქრები გადასცეს.

"პირველ ადგილზე გასულმა გუნდმა თასი აიღო. ასევე გადაეცათ სიგელები. გარდა ამისა, ინდივიდუალური საჩუქრები იყო პირველ და მეორე ადგილზე გასული გუნდებისთვის, მათ მედლები და ფასიანი საჩუქრები გადაეცათ", - ამბობს ახალციხის მუნიციპალიტეტის გამგეობის კულტურის სამსახურის უფროსი მაია სხირტლაძე.

[თამარ თოთაძე, ახალციხე]