მეუღლის სახელით ნაყიდი უძრავი ქონება

მესამე დღეა ახალციხის ცენტრში, ძველი ბაზრის ტერიტორიაზე გაწმენდითი სამუშაოები მიმდინარეობს. ივერიელის ქუჩა N 5–ში მდებარე 2156 კვადრატულ მეტრ ფართობზე დაანგრიეს ყველა ძველი შენობა, რაც კი იყო. ტერიტორიას ხის ღობე გაუკეთეს და ამჟამად ნარჩენები გააქვთ. სამი დღეა სამუშაოებს თვალს ადევნებს ახალციხის მაჟორიტარი დეპუტატი გელა პეტაშვილი. თუმცა, კითხვაზე, რა ინტერესი აქვს მას ამ ტერიტორიასთან, გვპასუხობს, რომ არაფერი: „შპს „მესხური ნობათის“ დირექტორი ოლეგ პეტაშვილია, მფლობელი კი რუსუდან გოგოლაძე“.
ოლეგ პეტაშვილი დეპუტატის ბიძაა, რუსუდან გოგოლაძე კი მისი მეუღლე. საჯარო რეესტრის მონაცემებით, ახალციხეში, ივერიელის ქუჩა N 5–ში მდებარე არასასოფლო ტერიტორიის მეპატრონე ნამდვილად რუსუდან გოგოლაძეა.

ტერიტორია რომ დეპუტატმა იყიდა, ამას ტერიტორიის რვა ყოფილი მფლობელიდან ერთ–ერთიც გვიდასტურებს.

შეგახსენებთ, რომ ძველი ბაზრის ადგილას, კვლავ ბაზარს აკეთებენ. როგორც ტერიტორიის მეპატრონეები აცხადებენ, ძველი ბაზრის ტერიტორიაზე ახალი თანამედროვე სტანდარტების სასურსათო ბაზარი სავარაუდოდ, 3 თვეში გაიხსნება.



[Sknews.ge]