დაკეტვიდან ერთი წლის თავზე ძველი ბაზარი ისევ გაიხსნა

ძველ ბაზარში, ღია ცის ქვეშ, დღეს მხოლოდ ხილ-ბოსტნეულით დატვირთული მარშუტკები იდგა. ტერიტორია, სადაც ვაჭრობა შეიძლება მანქანის საბურავებითა და ბანანის ყუთებითაა გამოყოფილი. ტერიტორიას რამდენიმე მეპატრონე ჰყავს და ყველა მათგანს ადგილის სავაჭრო მიზნით გამოყენება აღარ სურს.

მუხედავად ამ პირობებისა, მოვაჭრეები ჩავლილი დღით კმაყოფილები არიან და ამბობენ, რომ საშუალოდ 50 ლარამდე ივაჭრეს. რვა მოვაჭრიდან ექვსი ქალაქის შემოსასვლელში მდებარე კომფორტული ”ალფა მარკეტიდან” ამოვიდა, ორი კი ის მოვაჭრეა, რომლებიც ბაზრის ადგილმდებარეობის შეცვლის შემდეგ სავაჭროდ ყოფილი ბაზრის გარეთ დადგნენ.

ხილ-ბოსტნეულზე მოვაჭრე მალხაზ თათოშვილი, რომელიც აქამდე კომბოსტოსა და ხილს ”ალფა მარკეტში” ყიდდა, ამბობს, რომ დღეს თითქმის მთელი მარშუტკა პროდუქტი გაყიდა: ”მართალია, პირობები ახლ ბაზარში უკეთესია, მაგრამ ვაჭრობა აქ ჯობია”.

კლიენტების რაოდენობით კმაყოფილია სიმონ ყულჯანიშვილიც, რომელიც, მას შემდეგ, რაც ბაზარი გაუქმდა, ბოსტნეულს ყოფილ ბაზართან სახელდახელოდ მოწყობილ სავაჭრო დახლზე ყიდდა.

მოვაჭრეები ერთხმად ამბობენ, რომ ამ ბაზრის უპპირატესობა მხოლოდ ადგილმდებაროებაა. პირობებით ახალი ბაზარი სჯობია. ქირა კი ორივე სავაჭრო ადგილას ერთი და იგივე, ერთ კვადრატულ მეტრზე ორი ლარია.

ყოფილ ბაზარს რამდენიმე მფლობელი ჰყავს. გარდა შპს ”ბაზრისა”, რომელსაც რვა მეწილე ჰყავს, ტერიტორიის ოთხი კვადრატული მეტრი ორ სხავადასხვა კერძო პიროვნებას ეკუთვნის. არცერთი მათგანი ტერიტორიის სავაჭროდ გადაქცევას აღარ აპირებს, ბაზრის სრული დატვირთვის ამუშავების შემთხვევაში კი ისინი მისასვლელი გზის გარეშე რჩებიან.

შპს ”ბაზრის” მოლარე რუსუდან გაჩეჩილაძე ამბობს, რომ კერძო პირებთან მოლაპარაკებები მიდის და პრობლემა რამდენიმე დღეში მოგვარდება. სავარაუდოდ, ამის შემდეგ დაიწყებს ყოფილი და დღეს უკვე ამოქმედებული ბაზრის ადმინისტრაცია იმაზე ფიქრს, რა გაკეთდეს ბაზარში.

”იყოს ორივე ბაზარი, ხალხი ბევრია, მოთხოვნა იქნება. ავიღებთ კრედიტებს და გავაკეთებთ აქ ბაზარს ნორმალურად. ამ ზამთარს ალბათ იქნება ასე და გაზაფხულზე გავაკეთებთ”, - ამბობს იგი.

[ნინო ნარიმანიშვილი, ახალციხე]