ადგილობრივი ხელისუფლების დახმარების უშედეგო ლოდინში, გოხაძეებს სახლი ჩამოენგრათ

სახლი, დღეს, დაახლოებით 14:00 საათისთვის ჩამოინგრა. ამ დროს ოჯახის დიასახლისი ია გოხაძე ოთახში იყო.

„იმ ოთახში ვიყავი, რომელიც ჩამოინგრა, გამოვედი თუ არა ხმაური გავიგონე, ვიდრე აივნამდე მოვიდოდი, კედელი მთლიანად გადაწვა“ - ამბობს ია გოხაძე და ამატებს, - ამ დროს ჩემი დედამთილი და შვილი აივანზე იყვნენ. საბედნიეროდ, არავინ დავშავებულვართ“.

მისი თქმით, სახლი ამორტიზებული იყო და ადგილობრივ თვითმმართველობას დახმარების მოთხოვნით არაერთხელ მიმართეს, თუმცა ამაოდ: „ვიდრე არჩევნების შემდეგ ხელისუფლება შეიცვლებოდა, გამგეობაში განცხადებებიც დავწერეთ, მაგრამ ყურადღება არავის მოუქცევია“.

დღეს, ახლადარჩეული გამგებელი ზაზა მელიქიძე, გოხაძეებთან თავად მივიდა და შემთხვევის ადგილი დაათვალიერა. მომხდარიდან რამდენიმე წუთში შემთხვევის ადგილზე მივიდა სამაშველო სამსახური და საპატრულო პოლიციაც.
ამჟამად სამაშველო სამსახურის თანამშრომლები ავარიული სახლის სახურავს ამაგრებენ, რომ არ ჩამოინგრეს და დანარჩენი ნაწილიც არ დააზიანოს.

გოხაძეები ამბობენ, რომ მათ გამგებელი საშენი მასალით მომარაგებას დაპირდა. „რაც საჭირო იქნება, ყველაფერს მოგვცემენ“, - გვითხრა ია გოხაძემ.

ახალციხის მუნიციპალიტეტის გამგებელი ზაზა მელიქიძე აცხადებს, რომ ბიუჯეტში მსგავსი შემთხვევებისთვის თანხა გათვალისწინებული არ არის. ამიტომ დასახმარებლად რეგიონული განვითარებისა და ინფრასტრუქტურის სამინისტროს უნდა მიმართონ.

„სამინიტროს მივმართავთ, რომ ასეთი გადაუდებელი შემთხვევის დროს დაგვეხმარონ. რისი საშუალებაც გვექნება, იმით დავუდგებით გვერდში“, - აცხადებს მელიქიძე.

თუმცა, როდის ან რა რაოდენობის საშენი მასალა შეიძლება გამოიყოს გოხაძეებისთვის, გამგებელი ვერ აკონკრეტებს, - „ამ პროცედურების გავლას დრო სჭირდება. ახლა რაც მთავარია გამოვნახეთ ძელები, რომ სახურავი გავამაგროთ. მოხსნიან ჩამონგრეული კედლის ნაწილსაც, რომ მის გამო ვინმე არ დაზიანდეს“.

მელიქიძის განცხადებით, სახლის ჩამონგრევის მიზეზი სავარაუდოდ მისი არასწორი მშენებლობაა, თუმცა, ამას საბოლოოდ შესაბამისი კომისია გაარკვევს: „ინფრასტრუქტურის სამსახურის წარმომადგენლები შეისწავლიან ზარალის ოდენობასაც“.

[თამუნა უჩიძე, ახალციხე]