ადგილობრივები: "სამშენებლო სამუშოების გამო სახლის კედელი ჩამოინგრა"

ახალციხეში, წმინდა ანდრია პირველწოდებულის ქუჩაზე მცხოვრებლები ამბობენ, რომ N28–ში მდებარე სახლის კედელი დღეს, 16 ივნისს, დაახლოებით 19:00 საათზე ჩამოინგრა. იმ შენობის გვერდით, რომელსაც კედელი უკვე აღარ აქვს, სამშენებლო სამუშაოები მიმდინარეობს. ადგილობრივები მიიჩნევენ, რომ მიზეზი სწორედ ეს მშენებლობა გახდა.

„გათხრითი სამუშაოების დროს ბინას ძირი გამოეცალა და სახლის ერთი კედელი მთლიანად ჩამოინგრა. სახლში არავინ იყო და არავინ დაშავებულა“, – აცხადებენ ადგილობრივები.

მათივე თქმით, აღნიშნული ბინა გაქირავებულია და შიგ ოთხი ადამიანი, მათ შორის ორი მცირეწლოვანი ცხოვრობს.

„ჩვენ ამ ბინაში არ ვცხოვრობთ“, – გვითხრა ახალგაზრდა მამაკაცმა, რომელიც სახლში დაგვხვდა, თუმცა მან მომხდარზე საუბარი არ ისურვა.

ადგილობრივების განმარტებით სამშენებლო სამუშაოები ანდრია პირველწოდებულის ქუჩაზე, დაახლოებით, ორი კვირის წინ დაიწყო და დღემდე გრძელდება: „კბილის ექიმმა საანიშვილმა იყიდა და სახლს აშენებს“, – გვითხრეს მათ.

აქ რომ სახლის სამშენებლო სამუშაოები მიმდინარეობს, ეს სატელეფონო საუბარში „სამხრეთის კარიბჭეს“ მესაკუთრემ ივანე საანიშვილმაც დაუდასტურა: „ეგ კედელი არ ჩამონგრეულა, ჩვენ დავანგრიეთ“.

საანიშვილი ირწმუნება, რომ ის სახლიც, რომელსაც ამჟამად ცალ მხარეს კედელი არ აქვს, თუმცა შიგნით საოჯახო ნივთები ამ დრომდე ჩვეულბრივ აწყვია, მისი საკუთრებაა, ამდენად აქ კედელიც თავად მოხსნა: „არაფერი არ უნდა დაწეროთ, არასწორი ინფორმაცია მოგაწოდეს მეზობლებმა“.

ახალციხის მერიაში აცხადებენ, რომ აქ ივანე საანიშვილს სამშენებლო სამუშაოებზე ნებართვა მიღებული აქვს. ზედამხედველობის სამსახურის უფროსის მიხეილ მაკარიძის განმარტებით, პერიოდულად სამუშაოებს ზედამხედველობას მათივე სამსახური უწევს: „დეტალების დაზუსტება შესაძლებელი ორშაბათს, სამუშაო საათებში იქნება. ამ დროისთვის თუ ვინმე დაზარალებულია, შეუძლიათ შესაბამის სტრუქტურებს მიმართონ“.

შინაგან საქმეთა სამინისტროსა და საგანგებო სიტუაიცების მართვის სააგენტოში აღნიშნული ქუჩიდან შეტყობინება არ შესულა.









[თინათინ ზაზაძე, ახალციხე]