„მამამ ბიჭები რომ დახოცა, შვილი ეუბნებოდა ერთი გაიქცა და ისიც მოკალიო“

ადიგენში გარდაცვლილი ახალგაზრდების ახლობლები დღეს სამცხე-ჯავახეთის სამხარეო მთავარ სამმართველოსთან შეიკრიბნენ და მდუმარე აქცია გამართეს. მათი მთავარი მოთხოვნა მკვლელობაში ბრალდებული დავით კუბლაშვილის შვილის დასჯაა.

როგორც იმერთუბანში მცხოვრები გელა სირბილაძე ამბობს, კუბლაშვილს მაშინ, როცა მან მკვლელობა ჩაიდინა შვილიც თან ახლდა: „ბიჭები რომ დახოცა, შვილი ეუბნებოდა, ერთი ბუჩქებში გაიქცა და ისიც მოკალიო. მერე მამამ შვილს უთხრა გაიქეცი, რომ სუფთა გამოჩნდეო“.

დანაშაულის მთავარი მონაწილე, რომ ბრალდებულის შვილია, ამაზე საუბრობს ბორის სირბილაძეც: „მან გააუბედურა მამა, მან დაურეკა, მამამისს მცემენ და მიშველეო. ხომ შეიძლებოდა ეთქვა მამისთვის ჩემი მეგობრები არიან, ერთად დავლიეთ და ნუ ხოცავ ამათო?! ინფორმაცია მოგვივიდა დანაშაული შვილს არ უმტკიცდებაო, არადა მამაზე მეტი დამნაშავე ისაა“.

ყარათუბნელები ამბობენ, რომ ვიდრე გარდაცვლილებს დაასაფლავებენ, მდუმარე აქციებს გამართავენ და თუ მათი მოთხოვნა არ დაკმაყოფილდება აქციები პერმანენტულ სახეს მიიღებს.

„დღეს სპონტანურად შევიკრიბეთ. ჯერ ვიდრე ბიჭებს დაასაფლავებენ, მთელი სოფელი იქაა. მთელი სოფელი და მთელი ქვეყანა დადგება ჩვენს გვერდით, ისე როგორც ამას თხოვდა წლების წინ ცხონებული გირგვლიანის დედა. მაშინ რომ მთელი საქართველო დამდგარიყო ფეხზე ამდენი მკვლელობა არ მოხდებოდა“, - ამბობს გოდერძი კუბლაშვილი.

აქციის მონაწილეებთან სამხარეო სამმართველოდან არავინ გამოსულა, შინაგან საქმეთა სამინისტროს პრესამსახურში კი განაცხადეს, რომ ბრალდებულის შვილი უკვე დაკითხულია, თუმცა ამ დრომდე მისი ბრალეულობა არ იკვეთება.

„თუ სხვა მოწმეების ჩვენებებით მისი ბრალეულობა გამოიკვეთება, ამასაც გამოიძიებენ“, - განაცხადა შსს პრესსამსახურის წარმომადგენელმა ეკატერინე ათოშვილმა.

შეგახსენებთ, რომ 28 აგვისტოს, მარიამობის დღესასწაულზე სოფელ იმერთუბანში (ყარათუბანში) მცხოვრები სამი ახალგაზრდა მამაკაცი მოკლეს, ერთ-ერთი გარდაცვლილის ძმა კი დაჭრეს. მკვლელობაში ბრალდებული ადიგენში საჯარო რეესტრის ეროვნული სააგენტოს უფროსი დავით კუბლაშვილია, რომელიც შსს–მ ცხელ კვალზე დააკავა.



[თამუნა უჩიძე, ახალციხე]