საზაფხულო სკოლის სტუდენტები ახალციხეს ესტუმრნენ

საერთაშორისო საზაფხულო სკოლაში "კარგი მმართველობა" სხვადასხვა ქვეყნის 40 სტუდენტი იღებს მონაწილეობას. უცხოელ სტუდენტებთან ერთად, სკოლის კურსს გადიან ადგილობრივი, მათ შორის საქართველოში მცხოვრები ეთნიკური უმცირესობების წარმომადგენლები.

"სტუდენტებს ვუტარებთ ლექციებს, რომლებსაც როგორც ქართველი, ასევე უცხოეთიდან მოწვეული ლექტორები კითხულობენ, ასევე ხვდებიან საქართველოში მოღვაწე სხვადასხვა რანგის საჯარო მოხელეებს. ამ პროექტის ფარგლებში ჩვენი სტუდენტები განათლებას ესტონეთის ერთ–ერთ უნივერსიტეტში მიიღებენ და სტაჟირებას გაივლიან", – ამბობს ივანე ჯავახიშვილის სახელობის თბილისის სახელმწიფო უნივერსიტეტის რექტორის მრჩეველი ვახტანგ ჭარაია.

მისივე თქმით, სწორედ სტუდენტების სურვილი იყო, რომ ეთნიკურ უმცირესობებით დასახლებულ რეგიონს სწვეოდნენ.

"აინტერესებდათ როგორ მუშაობენ თვითმმართველობის ორგანოები, სამხარეო ადმინისტრაცია, როგორი სახის პროექტები გვაქვს, ასევე დაინტერესდნენ ეთნიკური უმცირესობების მდგომარეობით. ჩვენ ძალიან ნასიამოვნები დავრჩით ამ დიალოგით",– ამბობს სამცხე–ჯავახეთის სახელმწიფო ადმინისტრაციის რეგიონული პროექტების კოორდინირების სამსახურის უფროსი მარინა გაჩეჩილაძე.

აღნიშნული პროექტი ესტონეთის საგარეო საქმეთა სამინისტროს დაფინანსებით და თბილისის სახელმწიფო უნივერსიტეტის, ტარტუს უნივერსიტეტის (ესტონეთი) და ინფორმაციის თავისუფლების განვითარების ინსტიტუტის თანაორგანიზებით ხორციელდება.

შეხვედრის შემდეგ სტუდენტებმა ახალციხის ციხე დაათვალიერეს.

[თინათინ ზაზაძე, ახალციხე]