სამცხე–ჯავახეთის უნივერსიტეტმა თსუ–სთან მემორანდუმი გააფორმა

ვიზიტის ფარგლებში,სამცხე–ჯავახეთის სახელმწიფო უნივერსიტეტსა და ივანე ჯავახიშვილის სახელობის თბილისის სახელმწიფო უნივერსიტეტს შორის ურთიერთთანამშრომლობის მემორანდუმი გაფორმდა.

ვლადიმერ პაპავამ სამცხე–ჯავახეთის სახელმწიფო უნივერსიტეტის ორივე შენობა დაათვალიერა. ივანე ჯავახიშვილისა და გრიგოლ ხანძთელის ძეგლები ყვავილებით შეამკო და სტუდენტებთან საჯარო ლექცია წაიკითხა თემაზე: „საქართველოს ეკონომიკა გუშინ, დღეს, ხვალ“.

„ახალგაზრდების დაინტერესება იყო ძალიან დიდი. ძალიან კარგი, მწვავე და კარგად ფორმულირებული კითხვები ჰქონდათ“, – აღნიშნა ვლადიმერ პაპავამ ლექციის დასრულების შემდეგ.

თსუ–ს ლექტორმა სამცხე–ჯავახეთის სახელმწიფო უნივერსიტეტის რექტორი მერაბ ბერიძე ივანე ჯავახიშვილის სახელობის თბილისის სახელმწიფო უნივერსიტეტის მედლით დააჯილდოვა.

„დღეს ბედნიერი დღე იყო, გავაფორმეთ ურთიერთთანამშრომლობის მემორანდუმი. ეს მხოლოდ პირობითია, ჩვენ აქამდეც ვთანამშრომლობდით და მომავალშიც გავაგრძელებთ თანამშრომლობას“, – განაცხადა მერაბ ბერიძემ.



[თინათინ ზაზაძე, ახალციხე]