წარჩინებული სტუდენტები ახალციხის მერიაში სტაჟირებას გაივლიან

ახალციხის მუნიციპალიტეტის საკრებულომ მერიასა და საკრებულოში სტუდენტების სტაჟირების გავლის წესი და დაგენილება 31 ოქტომბერს გამართულ საკრებულოს სხდომაზე მიიღო.

სტუდენტებს სტაჟირების გავლა სპეციალობის მიხედვით შეეძლებათ, თუმცა მანამდე კონკურსის გავლა მოუწევთ. ახალციხის მერია კონკურსს წელიწადში ორჯერ: გაზაფხულსა და შემოდგომაზე გამოაცხადებს.

რამდენ სტუდენტს მიიღებენ სტაჟირებაზე, საჯარო სამსახურში დასაქმებული თანამშრომლების რაოდენობაზეა დამოკიდებული.

„სტაჟირების პერიოდისთვის შევამოწმებთ რაოდენობას შტატებისას და იმის მიხედვით გავითვალისწინებთ რამდენი სტაჟიორი უნდა გვყავდეს“, – ამბობს ქალაქ ახალციხის მუნიციპალიტეტის საკრებულოს მთავარი სპეციალისტი იურიდიულ საკითხებში თინათინ დიაკონაშვილი.

სტაჟირებისთვის კონკურსში ელექტრონულად გამოცხადდება და მსურველს 10 დღის ვადა ექნება. კონკურსი საჯარო სამსახურის ბიუროს ვებგვერდზე გამოცხადდება. გამარჯვებულებს საკონკურსო კომისია შეარჩევს.

[თინათინ ზაზაძე, ახალციხე]