მუნიციპალიტეტის საჩუქარი ბაღებს

ნინი ოსეფიანი ბაღში ორი წელია რაც დადის. იმის გამო, რომ ძველი სათამაშოები არ მოსწონდა, აქამდე ბაღში სახლიდან საკუთარი თოჯინები მიჰქონდა. ახლა მეგობრებთან ერთად ახალი სათამაშოებით თამაშობს.

მესამე ბაგა-ბაღში ოთხი ჯგუფია. ბაღის გამგის ლიზა ღავთაძის თქმით, ახალი სათამაშოების მიღების შემდეგ ბავშვებს ბაღში მისვლა უხარიათ: ”90-იანი წლების შემდეგ სათამაშოები აღარ მიგვიღია, ბავშვები ძველი სათამაშოებით თამაშობდნენ. ჩვენ ბაღს 630 ლარის სათამაშოები გადმოეცა და ოთხივე ჯგუფს თანაბრად გავუნაწილეთ”.

ახალციხის მუნიციპალიტეტის მასშტაბით ცხრა ბაღი ფუნქციონირებს. აქედან ერთი ვალეშია. ადგილობრივი მუნიციპალიტეტის ბიუჯეტიდან ბაღებისთვის 5000 ლარი გამოიყო. 27 დასახელების სათამაშო მუნიციპალიტეტის ყველა ბაღში თანაბრად გადანაწილდა.

სკოლამდელი აღზრდის დაწესებულებათა გაერთიანების დირექტორი მზია ქობესაშვილი ადგილობრივი ხელმძღვანელობის მადლობელია და ამბობს, რომ უახლოეს მომავალში რამდენიმე ბაღს ტექნიკასაც შეუძენენ: ”იგეგმება 8 მაცივრის. ორი გაზქურის და ხორცის ელექტრომანქანის შეძენა. ამისათვის გამგეობის მიერ ტენდერი უკვე გამოცხადებულია”.

მიმდინარე წლის პირველი იანვრიდან ბაღებში გადასახადი ათი ლარით გაიზარდა და ამ ეტაპზე 30 ლარს შეადგენს. ქობესაშვილის თქმით, სკოლამდელი აღზრდის დაწესებულებებში მდგომარეობა უმჯობესდება, რაზეც ბაღებში ბავშვების რაოდენობაც მეტყველებს: ”მუშაობა 400 ბავშვით დავიწყეთ, დღეს კი 1000-ზე მეტი ბავშვი გვყავს. იმის გამო, რომ ბავშვებს ვეღარ ვიღებდით, გამგეობას თხოვნით მივმართეთ და პირველი ივნისიდან ოთხი სააღმზრდელო ჯგუფი დაგვიმატეს”.

[თინათინ ზაზაძე, ახალციხე]