ბაღებში საკადრო ცვლილებები დაიწყო

ყოფილი ხელმძღვანელი მზია ქობესაშვილი ისევ გაერთიანებში რჩება. ”ახალციხის სკოლამდელ დაწესებულებათა გაერთიანებას” ახალი შტატი, დირექტორის მოადგილის თანამდებობა დაემატა, ამ პოსტზე იმუშავებს დღეიდან ქობესაშვილი.

- ”ვაპირებთ ერთობლივი მუშაობით და ახალი შემართებით მივხედოთ ბაღებს. გაზაფხულიდან ყველა ბაღის გარემონტება იგეგმება. ყველა ბაღში მივალთ და გავარკვევთ რა მდგომარეობაა”, - გვითხრა ნანა გელაშვილმა.

გელაშვილი ბაღებში საკადრო ცვლილებებს არ გამორიცხავს: ”რეორგანიზაცია აუცილებლად იგეგმება. შეიძლება განთავისუფლდნენ პენსიონერი თანამშრომლები და მენეჯერები. თუმცა, ჯერჯერობით ყველა თავის თანამდებობაზე მუშაობს”.

ახალი ხელმძღვანელი არაოფიციალური ვიზიტით დღეს მეოთხე ბაგა ბაღს ესტუმრა.

- ”ბავშვთა კონტიგენტს გადახედეს, არის თუ არა საჭირო სასწრაფოდ ახალი ჯგუფის დამატება. გასულ თვეებში გაცილებით მეტი გყავდა და ამიტომ გადაწყდა ჯგუფის დამატება, დაათვალიერეს ბაღის ტერიტორია და გაესაუბრნენ მასწავლებლებს”,- გვითხრა ბაღის მენეჯერმა მარინა თოთაძემ.

სკოლამდელი აღზრდის დაწესებულებებში ჯგუფების დამატება მარტის თვეში იგეგმება.

- ”1 მარტიდან ოთხ ბაღში დაემატება ახალი ჯგუფები. ასევე მარტის თვიდან შეუერთდება სოფლებში მდებარე ალტერნატიული ბაგა-ბაღები: აგარის, სხვილისის აწყურის ანდრიაწმინდის, კლდის და ურაველის”,-გვითხრა გელაშვილმა.

ნანა გელშვილმა 1985 წელს დაამთავრა პოლიტიკური ინსტიტუტის ქიმიის ფაკულტეტი. 1997 წლამდე მუშაობდა პურის ქარხანაში ინჟინერ-ტექნოლოგად და კადრების განყოფილების გამგედ.

შეგახსენებთ, სკოლამდელი აღზრდის დაწესებულენები მუნიციპალიტეტის საკრებულოს თავმჯდომარემ წლის პრიორიტეტად გამოაცხადა. იანვრისა დასაწყისიდანვე საუბრობდნენ ბაღებში მოსალოდნელ საკადრო ცვლილებებზეც.

დღეიდან სარემონტო სამუშაოების გამო შეჩერებული სასწავლო პროცესიც ყველა ბაღში განახლდა.
[თინათინ ზაზაძე, ახალციხე]