ახალციხის მეხუთე საბავშვო ბაღს ახალი მენეჯერი ჰყავს

ნანა ბარბლიშვილი ამავე საბავშვო ბაღის მენეჯერის მოვალეობას ექვსი თვის განმავლობაში ასრულებდა. როგორც ახალციხის სკოლამდელი აღზრდის დაწესებულებათა გაერთიანების ხელმძღვანელი ნანა ბერიძე ამბობს, ბარბლიშვილმა დაკისრებული მოვალეობა კარგად შეასრულა, ამიტომ გადაწყდა, რომ მეხუთე საბავშვო ბაღის მენეჯერად ოფიციალურად დანიშნულიყო.

ნანა ბარბლიშვილი ახალციხის მეხუთე საბავშვო ბაღის მენეჯერად ოფიციალურად 1 მაისს დაინიშნა.

ბიოგრაფია
ნანა ბარბლიშვილი 1969 წელს ადიგენის რაიონის სოფელ უდეში დაიბადა. დაამთავრა უდის პირველი საჯარო სკოლა.
1987 წელს ჩააბარა თბილისის ტექნიკურ უნივერსიტეტში, ინჟინერ – ელექტრიკოსის სპეციალობაზე.
2012 – 2013 წლებში დაამთავრა სამცხე – ჯავახეთის სახელმწიფო უნივერსიტეტი მასწავლებელთა გადამზადების კურსები.
ამავე წლებში მუშაობდა სხვადასხვა არასამთავრობო ორგანიზაციებში. დაწერილი აქვს პროექტი სოფელ არალში შეზღუდული შესაძლებლობების მქონე ბავშვებისთვის, რომელიც დღემდე ხორციელდება.
2013 წლიდან 2014 წლის დეკემბრამდე იყო მეხუთე საბავშვო ბაღის აღმზრდელი.
2014 წლის დეკემბრიდან 2015 წლის 1 მაისამდე იყო ამავე საბავშვო ბაღის მენეჯერის მოვალოების შემსრულებელი.

შეგახსენებთ, რომ ახალციხის მეხუთე საბავშვო ბაღს ახალციხის მუნიციპალიტეტის საკრებულოს ყოფილი თავმჯდომარის მეუღლე ნინო ბაღდოშვილი ხელმძღვანელობდა.

ნინო ბაღდოშვილმა სამსახურიდან წასვლის შესახებ განცხადება 2014 წლის 2 დეკემბერს დაწერა. მას შემდეგ, რაც ქალაქის მერს ბაღში შეტანილ პურში აღმოჩენილი თაგვის კვალი აჩვენა.

ახალციხის სკოლამდელი აღზრდის დაწესებულებათა გაერთიანებაში ბაღდოშვილის განცხადება 5 იანვარს დააკმაყოფილეს.

[მანანა სარაშვილი, ახალციხე]