ახალციხის მერმა ბაგა–ბაღები მოინახულა

გიორგი კოპაძე საბავშვო ბაღების თანამშრომლებს შეხვდა და სკოლამდელი აღზრდის დაწესებულებებში არსებულ პრობლემებს გაეცნო.

მისი განცხადებით, ქალაქში არსებული იმ ბაგა–ბაღებისთვის, რომლებიც სრულ რეაბილიტაციას საჭიროებენ, თანხას მომავალი წლის ბიუჯეტში გაითვალისწინებენ, რაც შეეხება რეაბილიტირებულ ბაღებს აქ მდგომარეობა დამაკმაყოფილებელია.

„პირველ ბაგა–ბაღში ნორმალური ვითარებაა, სისუფთავეა. აქ ძირითადად ეზოა ცუდ მდგომარეობაში და ეს უნდა გაკეთდეს“, – ამბობს გიორგი კოპაძე და ამატებს, რომ იმ ბაღებში, სადაც მოსაწესრიგებელია ინფრასტრუქტურა, ან შესაძენია რაიმე ნივთი, ამ საკითხების მოგვარება შესაბამის სამსახურს დაევალება, იგი მოამზადებს პროექტს და ხარჯთაღრიცხვას.

ახალციხეში მოქმედი 8 ბაგა–ბაღია. აღსაზრდელების სიმრავლის გამო N1 ბაგა–ბაღში დამატებით ერთი ჯგუფი გაიხსნა. ასევე, დამატებით ერთი ჯგუფის გახსნა იგეგმება N3 ბაგა–ბაღშიც.

„დაახლოებით 280 ბავშვი გვყავს, ამიტომ მეცხრე ჯგუფი გავხსენით და მიღება შევწყვიტეთ, რადგან 35 ბავშვზე მეტი არ უნდა იყოს ჯგუფში. სამი ახალი თანამშრომელი დაგვემატა:ორი მასწავლებელი და ერთი ძიძა. მინდა გითხრათ, რომ ახალციხეში ყველაზე დიდი ჩვენი ბაღია“, – ამბობს N1 საბავშვო–ბაღის მენეჯერი ციცო საანიშვილი.

რამდენი ბავშია ახალციხის მასშტაბით არსებულ საბავშვო–ბაღებში ამ ეტაპისთვის უცნობია, რადგან ბაღებში მიღების მსურველთა განცხადებების მიღება არ შეწყვეტილა. მათი რაოდენობა ცნობილი კვირის ბოლოსთვის გახდება.



[sknews.ge]