ახალციხის ბაგა-ბაღებში ერთი კვირით სწავლა შეწყდა

ააიპ ახალციხის სკოლამდელი აღზრდის დაწესებულებათა გაერთიანება ორად გაიყო. ახალციხის თემის სკოლამდელი აღზრდის დაწესებულებად და ქალაქ ახალციხის სკოლამდელი აღზრდის დაწესებულებად.

თვითმმართველ ქალაქში ხელმძღვანელად გაერთიანების ხელმძღვანელი ნანა გელაშვილი დარჩა, ხოლო თემში დროებით მოვალეობის შემსრულებლად, ყოფილი სამსახურის საქმის წარმოების სპეციალისტი ლელა ოქრომელიძე დაინიშნა.

ნანა გელაშვილის განმარტებით, ბაგა-ბაღებში სასწავლო პროცესის შეწყვეტის მიზეზი შესყიდვების სააგენტოსთან დაკავშირებული პრობლემებია.

"ბაღებში პროდუქციის შეტანასთან დაკავშირებით ტენდერი მთელი წლით გვქონდა გამოცხადებული. რეგიონული განვითარებისა და ინფრასტრუქტურის სამინისტროდან როცა იყვნენ ჩამოსული, ამ საკითხებზე ვესაუბრეთ და განგვიმარტეს, რომ ქალაქისა და თემის გაყოფის შემდეგ მესამე პირად შემოვიდოდა ახალი ააიპ-ი, რომელიც ჩამოყალიბდა. რეალურად, ცხელ ხაზზე რომ დავრეკეთ შესყიდვების სააგენტოში, გვითხრეს, რომ უფლება არ გვაქვს ტენდერი გავაგრძელოთ. ბაღებში პროდუქცია ვეღარ შევაქვს და ამიტომ შევაჩერეთ სწავლა“, - განმარტავს ნანა გელაშვილი.

მისივე თქმით, ვითარების გასარკვევად შესყიდვების სააგენტოში ოფიციალური წერილი უკვე გაგზავნეს. როდის აღდგება სწავლა ბაღებში, ამ წერილის პასუხზეა დამოკიდებული.

[თინათინ ზაზაძე, ახალციხე]