ადიგენის მუნიციპალიტეტის საკრებულოში ექვსი ფრაქცია შეიქმნება

ადიგენის მუნიციპალიტეტის საკრებულოს თავმჯდომარის ლევან ლობჯანიძის თქმით, ფრაქციები მას შემდეგ შეიქმნება, როცა იურიდიული საკითხთა კომისია სრულად ჩამოყალიბდება.

„იურიდიული საკითხთა კომისია ჯერ არ არის შევსებული, მხოლოდ აღნიშნული კომისიის თავმჯდომარის ვინაობაა ცნობილი. რამდენიმე დღეში სრულად დაკომპლექტდება. ამის შემდეგ ფრაქციებს შეეძლებათ კომისიას დოკუმენტაცია წარუდგინონ, რომელსაც კომისიის წევრები განიხილავენ და დასამტკიცებლადსაკრებულოს მომავალ სხდომაზე გამოიტანენ“, – ამბობს ლევან ლობჯანიძე.

მისივე თქმით, საკრებულოს შემდეგი სხდომა აგვისტოს პირველ კვირაში, სამშაბათ დღეს არის ჩანიშნული.

ფრაქცია „ერთიან ნაციონალურ მოძრაობას“ ადიგენის მუნიციპალიტეტის საკრებულოს ყოფილი თავმჯდომარე გივი ენდელაძე უხელმძღვანელებს.

„როგორც კი იურიდიულ საკითხთა კომისია მზად იქნება, ჩვენ ფრაქციის შექმნისთვის მაშინვე შევიტანთ საბუთებს. ნაციონალური მოძრაობის კოალიციაში შედის „ქრისტიან – კონსერვატორული პარტიაც“, ამიტომ ჩვენ უფლება გვაქვს, რომ ორი ფრაქცია ჩამოვაყალიბოთ და ასეც ვგეგმავთ“, – ამბობს ენდელაძე.

[მანანა სარაშვილი, ახალციხე]