სტიქიით დაზარალებული მოსახლეობისათვის დახმარების გაწევა დაიწყო

რეგიონის მასშტაბით დახმარებას 5403 ოჯახი მიიღებს. მათ შორის: ახალციხის მუნიციპალიტეტში -3356, ასპინძის მუნიციპალიტეტში - 533, ახალქალაქის მუნიციპალიტეტში -776, და ნინოწმინდის მუნიციპალიტეტში - 738.

სასურსათო პაკეტში 2 ტომარა ფქვილი, 3 ლიტრი ზეთი, და 10 კილოგრამი მაკარონი შედის.

პარალელურად, დაწყებულია დაზარალებული მოსახლეობის მომარაგება სახლების გადასახური მასალით. ახალციხეში დაზიანებული სახლების რაოდენობა - 1715-ია, ხოლო ასპინძაში-88.

სამხარეო ადმინისტრაციაში არსებული მონაცემებით 19 ივლისს მოსული სეტყვისა და წვიმის შედეგად მხარის 4 მუნიციპალიტეტში დაზარალებულია 5403 კომლი, ხოლო დაზიანებული - 2146 ჰექტარი სასოფლო სამეურნეო-სავარგული.

სტიქიის შედეგად ახალციხის მუნიციპალიტეტში 18 სოფელი და ქ.ახალციხე დაზარალდა. განსაკუთრებული პრობლემები შეიქმნა ქალაქ ვალეში. მუნიციპალიტეტის მასშტაბით დაზიანებულია 710 ჰექტარი სასოფლო-სამეურნეო სავარგული.

სეტყვამ ასპინძის მუნიციპალიტეტის ხუთი დასახლებული პუნქტი დააზარალა. ესენია: დამალა, ოთა, ოშორა, რუსთავი და იდუმალა. ასევე მძიმეა სოფელ იდუმალაში შექმნილი მდგომარეობა. ზიანი მიადგა 167 ჰექტარ სასოფლო-სამეურნეო სავარგულს.

სტიქია იყო ახალქალაქშიც, სადაც დაზარალდა სოფლები: გოგაშენი, აფნია, კიროვაკანი, ბარალეთი და კუმურდო. დაზიანდა 823 ჰექტარი.

სტიქიამ პრობლემები შექმნა ნინოწმინდის მუნიციპალიტეტშიც, აქ 446 ჰექტარი სასოფლო-სამეურნეო სავარგული დაისეტყვა.

[Sknews.ge]