სტიქია - პირველადი მონაცემები

ამ წუთის მონაცემებით 19 ივლისს მოსულმა სეტყვამ ახალციხის მუნიციპალიტეტში 18 სოფელი დააზარალა.

ასპინძაში დაზიანებულია დაბა ასპინძა და სოფლები: იდუმალა, ოთა და ოშორა. დასეტყვილი სასოფლო-სამეურნეო სავარგულების ფართობი 189 ჰექტარს აღწევს. გარდა ამისა, დაზიანებულია და სახურავის შეკეთება ესაჭიროება 84 საცხოვრებელ სახლს.

სამცხე-ჯავახეთის სამხარეო ადმინისტრაციაში ჯერჯერობით არ არის მონაცემები ახალქალაქის მუნიციპალიტეტიდან. თუმცა, ცნობილია, რომ ახალქალაქის მუნიციპალიტეტში დაზარალდა ოთხი სოფელი: ხოსპიო, გოგაშენი, აფნია და კუმურდო.

სტიქიამ დააზარალა ნინოწმინდის მუნიციპალიტეტიც. სამხარეო ადმინისტრაციის ამ დროის მონაცემებით, ნინოწმინდაში 493 ნაკვეთი დაისეტყვა.

სამცხე-ჯავახეთის სამხარეო ადმინისტრაციის ინფორმაციით, ზარალის დათვლა ჯერ არ დასრულებულა. რეგიონის მასშტაბით სოფლის რწმუნებულები დაზარალებული მოსახლეობის მონაცემებს ჯერ ისევ აგროვებენ. ამიტომ, ზარალის საბოლოო ოდენობის დადგენა ამ ეტაპზე შეუძლებელია.

შეგახსენებთ, რომ 19 ივლისს ძლიერმა სეტყვამ ახალციხის, ასპინძის, ახალქალაქისა და ნინოწმინდის მუნიციპალიტეტები დააზარალა. ამ დრომდე რეგიონი ცენტრალური ხელისუფლებიდან არავის მოუნახულებია.

[ნინო ნარიმანიშვილი, ახალციხე]