უნივერსიტეტში რექტორი შეიცვალა

საქართველოს მთავრობის განკარგულებას საქართველოს პრემიერ-მინისტრი ბიძინა ივანიშვილი აწერს ხელს.

”უმაღლესი განათლების შესახებ” საქართველოს კანონის 22-ე მუხლის მე-2 პუნქტის საფუძველზე, არასამეწარმეო (არაკომერციული) იურიდიული პირის - სამცხე-ჯავახეთის სახელმწიფო სასწავლო უნივერსიტეტის ხელმძღვანელის (რექტორის) პირველი არჩევნების შედეგების დამტკიცებამდე არასამეწარმეო (არაკომერციული) იურიდიული პირის - სამცხე-ჯავახეთის სახელმწიფო სასწავლო უნივერსიტეტის ხელმძღვანელის (რექტორის) მოვალეობის შემსრულებლად დაინიშნოს მერაბ ბერიძე”, - ნათქვამია 11 დეკემბრით დათარიღებულ განკარგულებაში, #1997.

ამ დრომდე უნივერსიტეტის რექტორის მოვალეობის შემსრულებლად ყოფილი ახალციხის სახელმწიფო სასწავლო უნივერსიტეტის რექტორი თინა გელაშვილი იყო დანიშნული. მისი დანიშვნის შესახებ 20 ოქტომბერს გამოცემულ დადგენილებას ყოფილი პრემიერ-მინისტრი ივანე მერაბიშვილი აწერდა ხელს.

მერაბ ბერიძე 1990 - 2005 წლებში ყოფილი თსუ ახალციხის ფილიალის დირექტორი იყო, 2002 -2005 წლებში კი ხელმძღვანელობდა ყოფილ თსუ ჯავახეთის ფილიალს ახალქალაქში. ბოლო პერიოდში იგი ყოფილი ახალციხის სახელმწიფო სასწავლო უნივერსიტეტის სრული პროფესორი იყო

მერაბ ბერიძის კანდიდატურა უნივერსიტეტის რექტორად, დეკემბრის დასაწყისიდან აქტიურად განიხილებოდა. თუმცა, ამ ინფორმაციას არც სამინისტრო ადასტურებდა და არც თავად მერაბ ბერიძე.

შეგახსენებთ, რომ სამცხე-ჯავახეთის სახელმწიფო სასწავლო უნივერსიტეტი 2012 წლის 1 ნოემბრიდან, ახალციხის სახელმწიფო სასწავლო უნივერსიტეტისა და ახალქალაქის უმაღლესი საგანმანათლებლო დაწესებულება კოლეჯის გაერთიანების შედეგად ჩამოყალობდა. რეორგანიზაციის საფუძველი საქართველოს მთავრობის 416-ე დადგენილება გახდა. დადგენილება 2012 წლის 3 ოქტომბერსაა მიღებული და მას საქართველოს ყოფილი პრემიერ-მინისტრი ივანე მერაბიშვილი აწერს ხელს.

[ნინო ნარიმანიშვილი, ახალციხე]