ახალი მოწვევის საკრებულოების პირველი სამუშაო დღე

ახალციხის მუნიციპალიტეტის საკრებულოს თავმჯდომარის მოადგილე გელა ნოზაძე

როგორც ახალციხის მუნიციპალიტეტის საკრებულოს თავმჯდომარის მოადგილე გელა ნოზაძე ამბობს, ამ ეტაპზე ახალციხის მუნიციპალიტეტისა და ქალაქ ახალციხის საკრებულოების ხელახლა დარეგისტრირება მიმდინრაეობს, რის შემდეგაც აღნიშნული სამსახურების დაკომპლექტება დაიწყება.

„გარდა ამისა, მიმდინარეობს საზღვრების დადგენა, სად სოფელის ტერიტორიაა და სად ქალაქის. პირველ ეტაპზე ეს საკითხებია მოსაგვარებელი, ამის შემდეგ დაიწყება საკრებულოების დაკომპლექტება“, – ამბობს გელა ნოზაძე.

მისივე თქმით, ახალი მოწვევის საკრებულო, გამგეობა და მერია ხელს არ შეუშლის იმ ინფრასტრუქტურული პროექტების დასრულებას, რაც ამ ეტაპზე ქალაქსა და სოფლებში მიმდინარეობს.

რაც შეეხება საკადრო ცვლილებებს, გელა ნოზაძის თქმით, ამ ეტაპზე გადაწყვეტილი არაფერია: „ძველ თანამშრომლებს ყველას შეუჩერდა უფლებამოსილება, თუმცა ისინი რჩებიან თავიანთ ადგილებზე, სანამ არ გამოცხადდება კონკურსი, რომელიც კანონით სამი თვის შემდეგ უნდა დაიწყოს. ჩვენ გვინდა, რომ გვყავდეს მოტივირებული ახალგაზრდები“.


ქალაქ ახალციხის საკრებულოს თავმჯდომარე კახა ბერიძე

ქალაქ ახალციხის საკრებულოს თავმჯდომარე კახა ბერიძე ამბობს, რომ ახალციხეზე ზრუნვას დღეიდან იწყებს: „დღეს ჩემი სამუშაოს პირველი დღეა.უკვე მზად ვარ მოქალაქეების მისაღებად და მათი პრობლემების მოსასმენად“.

ახალციხის მუნიციპალიტეტის საკრებულოს თავმჯდომარემ დავით ლომიძემ ახალციხის მუნიციპალიტეტის გამგებლის მოვალეობის ყოფილი შემსრულებელის სამუშაო კაბინეტი დაიკავა.

სად იქნება ქალაქ ახალციხის საკრებულოს თავმჯდომარის კაბინეტი ჯერ–ჯერობით გარკვეული არ არის.

„ჯერ ისიც არ ვიცი სად არის ჩემი სამუშაო კაბინეტი, რამდენიმე დღეში ყველაფერი დალაგდება“, – ამბობს კახა ბერიძე.

[მანანა სარაშვილი, ახალციხე]