ახალციხის თვითმმართველობაში არსებულ 70 ვაკანსიაზე 894 განაცხადი შევიდა

ახალციხის მუნიციპალიტეტის გამგეობაში აცხადებენ, რომ ყველაზე დიდი კონკურსი საქმის წარმოებისა და კადრების საკითხებში სპეციალისტისა და საორგანიზაციო განყოფილების უფროსის ვაკანსიაზეა. სპეციალისტის ვაკანსიაზე 37 განცხადება შევიდა, საორგანიზაციო განყოფილების უფროსის პოზიციაზე კი 34.

საკრებულოში კი ყველაზე მოთხოვნადი აღმოჩნდა წამყვანი სპეციალისტის პოზიცია საქმისწარმოების საკითხებში. ამ ადგილისთვის 50 კონკურსანტი იბრძვის.

როგორც გამგეობაში აცხადებენ, საკონკურსი – საატესტაციო კომისიის სამდივნო განცხადებებს მიმდინარე კვირაში გადაარჩევს, მეორე ეტაპზე გადასული კონკურსანტები კი ტესტირებას 13 და 14 დეკემბერს გაივლიან.

უკვე შექმნილია საკონკურსო – საატესტაციო კომისიაც, რომელიც მესამე ეტაპს – გასაუბრებას ჩაატარებს.

კომისიას ახალციხის მუნიციპალიტეტის გამგებელი ზაზა მელიქიძე უხელმძღვანელებს. წევრები არიან გამგებლის მოადგილე გურამ მელიქიძე, ახალციხის მუნიციპალიტეტის გამგეობის ადმინისტრაციის სამსახურის უფროსი ილია ზარდიაშვილი, ახალციხის მუნიციპალიტეტის საკრებულოს თავმჯდომარე დავით ლომიძე და სახელმწიფო რწმუნებულის – გუბერნატორის ადმინისტრაციის მთავარი სპეციალისტი ნინო ნემსაძე.
შეგახსენებთ, რომ თვითმმართველო თემის ახალციხის მუნიციპალიტეტის გამგეობაში 70 შტატზე კონკურსი 14 ნოემბერს გამოაცხადა, საბუთების მიღების ბოლო ვადა 23 ნოემბერი იყო.

[მანანა სარაშვილი, ახალციხე]