ახალციხის გამგეობაში 13 შტატზე კონკურსი ცხადდება

კონკურსი უახლოეს დღეებში გამოცხადდება და ახალციხის მუნიციპალიტეტის გამგეობის ოფიციალურ ვებ-გვერდზეე აიტვირთება.

მანამდე სანამ შედეგები ცნობილი არ გახდება, როგორც გამგეობაში აცხადებენ, არცერთი თანამშრომელი სამსახურიდან გათავისუფლებული არ იქნება. რაც შეეხება იმას, თუ რომელ შტატებზე გამოცხადდება კონკურსი ჯერ არ საჯაროვდება.

„ამის შესახებ, მას შემდეგ გავაცხადებთ, როცა უკვე ყველაფერი ჩამოყალიბებული გვექნება. კონკურსში მონაწილეობის მიღება ნებისმიერ პირს შეეძლება“, - ამბობს ახალციხის მუნიციპალიტეტის გამგებლის მრჩეველი გოჩა პარუნაშვილი.

მისი თქმით, გამეობაში საკადრო ცვლილებები ცივილური ფორმით და ყველა კანონის დაცვით განხორციელდება: „წინა მთავრობის პერიოდში რომ პოლიტიკური ნიშნით ხდებოდა ადამიანების დევნა, ასე აღარ მოხდება. დავაფასებთ ყველა ადამიანის ნაშრომს“.

პარუნაშვილი ამბობს, რომ საკონკურსო კომისიაც ჩამოყალიბების პროცესშია: „გამგეობაში ბევრი ადამიანი მოვალეობის შემსრულებელია და ასე დიდხანს აღარ გაგრძელდება. ჩვენთან დაახლოებით 8-9 სამსახურია და კონკურსი 13 შტატზე გამოცხადდება“.

[თამუნა უჩიძე, ახალციხე]