ახალციხის სოფლებში სტიქიით დაზიანებულ გზებს აკეთებენ, დაზარალებულების საკითხს კი ჯერ ისევ სწავლობენ

როგორც ახალციხის მუნიციპალიტეტის გამგეობაში განმარტავენ, სოფელ მუსხის მთის გზის რეაბილიტაცია რამდენიმე დღეში დასრულდება, რის შემდეგაც მინაძის გზის აღდგენითი სამუშაოები დაიწყება. ჭაჭარაქში დაზიანებული სასოფლო – სამეურნეო სავარგულების საკითხს კი რეგიონული განვითარების სამინისტრო ამ დრომდე სწავლობს.

მუსხში სამუშაოებს ტენდერში გამარჯვებული კომპანია შპს „ნუკრი“ ასრულებს. იგივე კომპანია შეაკეთებს გზას მინაძეშიც.

მუსხის მთის გზის რეაბილიტაციისთვის 6.202 ლარია გამოყოფილი, მინაძის შიდა სასოფლო გზის აღდგენისთვის კი 8.630 ლარი.

6 ივლისს ძლიერმა წვიმამ და ქარმა სოფელ ჭაჭარაქთან ახლოს არსებული სასოფლო – სამეურნეო სავარგულებიც დააზიანა. ზარალმა 8.910 ლარი შეადგინა. რა ბედი ელით ნაკვეთების მფლობელებს ჯერ უცნობია, ვინაიდან, რეგიონული განვითარებისა და ინფრასტრუქტურის სამინისტრო აღნიშნულ საკითხს ამ დრომდე სწავლობს.

შეგახსენებთ, რომ მიმდინარე წლის 6 ივლისს ძლიერი ქარისა და წვიმის შედეგად ხევიდან ჩამოსულმა ქვა – ღორღმა ახალციხე ახალქალაქის ცენტრალური მაგისტრალი ჩაკეტა და სოფლების მინაძისა და მუსხის შიდა სასოფლო გზები დააზიანა.

[მანანა სარაშვილი, ახალციხე]