სამცხე–ჯავახეთის გუბერნიაში საშვთა სისტემა აღადგინეს

სამცხე–ჯავახეთის სახელმწიფო რწმუნებულის – გუბერნატორის აპარატის უფროსი გიორგი მიქელაძე ირწმუნება, რომ საშვთა სისტემის აღდგენა საჯარო მოხელეებთან ურთიერთობას გააადვილებს.

„მოქალაქეები მივლენ მომსახურების ბიუროში, დასვამენ კონკრეტულ საკითხს, ჩვენი თანამშრომელი გასცემს კომპეტენტურ პასუხს, ვის უნდა მიაკითხოს, ვინ გადაუწყვეტს აღნიშნულ პრობლემას, რის შემდეგაც საშვს გამოუწერს. მათ შეუძლიათ განცხადება ბიუროში დატოვონ და აღარ ამოვიდნენ მესამე სართულზე. ზედმეტ დროს არც მოქალაქეები დაკარგავენ და არც თანამშრომლები“, – ამბობს გიორგი მიქელაძე.

ადმინისტრაციულ შენობაში საშვთა სისტემა 2012 წლის 31 მაისს დაწესდა. მოქალაქეები საშვის გარეშე არც სამხარეო ადმინისტრაციაში და არც ახალციხის მუნიციპალიტეტის გამგეობასა და საკრებულოში არ დაიშვებოდნენ. საშვთა სისტემის დაწესების შემდეგ, სამი თვის განმავლობაში „სამხრეთის კარიბჭე“ ახალციხის მუნიციპალიტეტის საკრებულოსა და გამგეობაში კომენტარის ჩაწერას თითქმის ვერცერთ საკითხზე ახერხებდა. მოქალაქეთა მომსახურების ბიუროში გვპასუხობდნენ, რომ გამგებელი ან საკრებულოს თავმჯდომარე გასული იყო ან ჩვენს მისაღებად არ ეცალა.

კითხვაზე – ხომ არ შეუქმნის ჟურნალისტებს საშვთა სისტემა იგივე პრობლემებს, ამჯერად გუბერნიაში, მიქელაძე გვპასუხობს, რომ მსგავსი რამ გამორიცხულია.
„ადმინისტრაციულ შენობაში შესვლა არავის შეეზღუდება. თუ რომელიმე საჯარო მოხელეს არ სურს კომენტარის გაკეთება, რა მნიშვნელობა აქვს ჟურნალისტი პირველ სართულზე მივა თუ მეორეზე“, – აცხადებს მიქელაძე.

[მანანა სარაშვილი, ახალციხე]