სამცხე-ჯავახეთის გუბერნიაში თანამშრომელთა ნახევარზე მეტს ხელახლა არჩევენ

გუბერნიაში ვაკანტური 25 პოსტია, მათ შორის, 17-ზე არავინ მუშაობს, 8-ს კი მოვალეობის შემსრულებელი ჰყავს. სამცხე-ჯავახეთის სამხარეო ადმინისტრაციაში სულ 46 თანამშრომელია, ამათგან კონკურსი არ ეხება 21 ადამიანს: გუბერნატორს, მის სამ მოადგილესა და იმ 17 თანამშრომელს, რომლებიც კონკურსით იანვარში შეარჩიეს.

საკონკურსო კომისიამ განმცხადებლების აპლიკაციების გადარჩევა გასულ კვირას დაიწყო.

„ბევრი განცხადება იყო და აპლიკაციების გადარჩევას კვირაზე მეტი დასჭირდა“, - განმარტავს სახელმწიფო რწმუნებულის-გუბერნატორის აპარატის უფროსი გიორგი მიქელაძე.

ამ კონკურსით ადმინისტრაციაში ოთხი სამსახური უნდა დაკომპლექტდეს: სახელმწიფო რწმუნებულის - გუბერნატორის აპარატი, ადგილობრივი თვითმმართველობის ორგანოებთან ურთიერთობის, რეგიონული პროექტების კოორდინირებისა და საგანგებო სიტუაციების მართვის. გარდა ამისა, უნდა შეირჩეს გუბერნატორის მდივან-რეფერანტი. სწორედ აღნიშნულ პოსტზეა ყველაზე მეტი, 35 განაცხადი შესული.

როდის დაიწყება კონკურსის მეორე ეტაპი, რომელ დღეებში დაინიშნება გასაუბრება და რა კრიტერიუმით შეარჩევენ კადრებს, ჯერ უცნობია.

„აპლიკანტებთან გასაუბრების დღეები და კითხვები გასაუბრებისთვის, აპლიკანტების საბუთების გადარჩევის შემდეგ გადება ცნობილი“ - განაცხადა გიორგი მიქელაძემ.

[მანანა სარაშვილი, ახალციხე]