უცხო ენა და ბიოლოგია – რამდენი მოსწავლე ჩაიჭრა ახალციხის სკოლებში

წლევანდელ სკოლადამთავრებულებს გამოცდა უცხო ენაში ჰქონდათ, ხოლო ბიოლოგიაში გამოცდა იმ მოსწავლეებმა ჩააბარეს, რომლებიც გასულ წელს ჩაიჭრნენ.

გამოცდა 09:00 საათზე დაიწყო და 18:00 საათამდე გაგრძელდა.

ქალაქის ექვს სკოლაში გამოცდებზე 10 მოსწავლე ჩაიჭრა.

გასული წლებისგან განსხვავებით, მიმდინარე წელს კურსდამთავრებულები ქულებით არ ფასდებიან. ტესტირების დასრულებისას მოსწავლე კომპიუტერის ეკრანზე ხედავს, არა ქულას, არამედ შეტყობინებას იმის შესახებ, გადალახა თუ არა მან ბარიერი (ანუ, მიიღო თუ არა მინიმალური კომპეტენციის 5,5–ზე მეტი თუ ნაკლები).

„საშუალო სირთულის კითხვები იყო, ვფიქრობ, რომ ძლიერი და სუსტი მოსწავლეც ჩააბარებდა. ტესტებში შემხვდა დიალოგები, ტექსტები, გრამატიკა და პირობითი წინადადებები. ყველაფერი ის რაც სკოლაში ვისწავლეთ“, – ამბობს მეხუთე საჯარო სკოლის კურსდამთავრებული მარიამ ვედიაკოვი, რომელმაც გამოცდა უცხო ენაში ჩააბარა.

გამოცდის ჩაბარება არც მისი თანასკოლელის გვანცა ნოზაძისთვის იყო რთული: „გამოცდა საშუალო სირთულის იყო. თუ გაგიჭირდებოდა პასუხის გაცემა, პროგრამა შედარებით მარტივ კითხვას გთავაზობდა“.



N1 საჯარო სკოლაში გამოცდაზე შესული 92 მოანწილიდან ბარიერი ყველამ გადალახა.

N2 საჯარო სკოლაში 37 კურსდამთავრებულიდან სამი ჩაიჭრა.

N3 საჯარო სკოლაში 62–დან ორი ჩაიჭრა.

N5 საჯარო სკოლაში 98 კურსდამთავრებულიდან ხუთი ჩაიჭრა.

N6 საჯარო სკოლაში 30 მონაწილედან ბარიერი ყველამ გადალახა.

კერძო სკოლა „მზექას“ 14 კურსდამთავრებულიდან გამოცდა ყველამ ჩააბარა.
საატესტატო გამოცდები გუშინ, 20 მაისს დაიწყო.

მე–12 კლასელები ხვალ, 22 მაისს გამოცდას ისტორიასა და ფიზიკაში დაწერენ.

[მარიამ ბარძიმაძე, ახალციხე]