ახალქალაქის სასამართლომ ცესკოს საჩივარი არ დააკმაყოფილა

ცენტრალურმა საარჩევნო კომისიამ ახალქალაქის სასამართლოს 3 სექტემბერს ახალქალაქის საოლქო კომისიაში მომხდარი ინციდენტის შემდეგ მიმართა. ცესკო ახალქალაქის საოლქო კომისიაში მყოფი კოალიციის წევრებისთვის უფლებამოსილების შეწყვეტას ითხოვდა.

შეგახსენებთ, რომ 4 სექტემბერს, დილით, ცენტრალურმა საარჩევნო კომისიამ გაავრცელა განცხადება, რომლის თანახმად, ახალქალაქის საოლქო საარჩევნო კომისიის შენობაში ამავე კომისიის წევრებმა მედეა ნეფარიძემ, ნინო ფხიკიძემ და საარჩევნო ბლოკის ”ბიძინა ივანიშვილი - ქართული ოცნება” წარმომადგენელმა ბეჟან გუნავამ საოლქო კომისიის თავმჯდომარეს ჰასმიკ მარანგოზიანს ფიზიკური შეურაცხყოფა მიაყენეს.

იმავე დღეს გავრცელდა ბეჟან გუნავასა და გიორგი ჟვანიას განცხადებებიც, რომლის თანახმად, ჰასმიკ მარანგოზიანი თავად არღვევდა კანონს. მათი თქმით, საოლქოს თავმჯდომარემ თავად მიაყენა შეურაცხყოფა კოალიციის წევრებს და ამის დამადასტურებელი ვიდეო-მასალაც არსებობდა.

როგორც კოალიციის ადვოკატი გიორგი ჯვარიძე აცხადებს, ინციდენტის შესახებ კომისიის წევრები ახალქალაქის სამმართველომ იმავე დღეს დაკითხა, მაგრამ საქმე არ აღძრულა. თუმცა, ახალქალაქის სასამართლოში საჩივარი შეიტანა ცენტრალურმა საარჩევნო კომისიამ.

”ახალქალაქის მოსამართლემ რამდენჯერმე გადადო პროცესი გაურკვეველი მიზეზით. ბოლოს გუშინ გაიმართა სხდომა, რომელზეც ცენტრალური საარჩევნო კომისიის სარჩელი არ დააკმაყოფილეს”, - აცხადებს გიორგი ჯვარიძე.

ადვოკატის განმარტებით, იმ შემთხვევაში თუ სასამართლო სარჩელს დააკმაყოფილებდა, კოალიციას საოლქო კომისიაში წარმომადგენლები აღარ ეყოლებოდა.

”იმდენად აშკარა იყო ჩვენი კომისიის წევრებისა და ბეჟან გუნავას უდანაშაულობა, რომ მიიღეს ადექვატური გადაწყვეტილება”, - ამბობს კოალიციის ახალქალაქის შტაბის ხელმძღვანელი გიორგი ჟვანია.

[sknews.ge]